Няръяна Ӈэрм
Ненэцие’ саӈохо’’на маниебцу’’
Новый Порт’ харад’ тер’ не Валентина Окотэтто падвы проект «Ямал: взгляд изнутри» я’ индадм’ нэкалпади «Газпром нефть» сертавы конкурсахана нюртей ян’ ха’’амвы…
Время для чтения ~ 2 минуты
Валентина Окотэтто вадё’’ма ямда сававна теневада, мэнеда, ӈадьбянда пыда тадтавыда ненэцие’ саӈохо’’на маниебцу’’. Пыда мале ӈока по’’ сидяӈг’’ сертаби. Ханяӈы’’ сидяӈгада Ямал’ нямна падвы книгаха’’на ӈа’’. Яна’ ил’ саиро’ ехэрана хибяри тикы манзаяха’ сырпата яна’’ хурка ӈэвам’ сававна манэтада. Тикы сава не хусувэй тадтавы сидяӈгада ӈамгэхэв илемяком’ вадета то’’олха: яв’ ид’ хамба’’, пидя’ мюд няӈгэрта’’ хойрю’’, ӈэдалёда’’ ненэця’’…
Валентина Хосевна нюрцьм ненэць’, пыда вадавнанда манзаяха’’ната харта Порт’ янда хурка ӈэвам’ ненэцяӈг’ ваде’’ман харва. Сидяӈгаха’’ната едэй ил’ тидхал’’, ненэцие’ ил’, я’ илебцу манэ’’лабтамби. Ӈэрм янда’ илм’ манэ’’лабтамбада’’ сидяӈгада ӈока ненэцие’ манэ’’ма е’’эмня я’ тиӈгэвна выставкаӈэ, манэ’’лабтярӈэ ядэлаван харвэйда.
Сяхари’ ненэцие’ ил’ ед’ сертавы’’ проект’’ ӈамгэхэв нюдя серкат ӈадиберта’’ ӈамгэ’’. Хибяри харта индя’ ӈыл тарця сава серм’ таслабта ӈани тарем’ ненэцяӈг’ падвэмда ӈадимде пиртада. Валентина Хосевна сяхаринда харта тадтавы сидяӈгаха’’ната ӈани пароӈоди’ явна ӈэдалёрць маня’’ ӈэрм яна’ илм’ вадета. Няна’’ манзаи’ «Няръяна Ӈэрм» газетахана ӈадимдембӈгуна’’.
Автор: Алла Вануйто’ падвы
Автор фото: Валентина Окотэтто
Авторы
Няръяна Нгэрм
Темы