обновлено: 05:44, 24 января 2024
Няръяна Ӈэрм
Ненэцие вадан’ тохолаӈгу
Теда’ ӈэрм’ тер’’ харто’ вадамдо’ нива юрыбавандо’ е’’эмня хуркари ӈаво ӈадимдемби’’. Ехэрана вадам’ тохоламбаван’ харвана’’ ӈани’ таня’’. Тандая’ е’’эмняндо’ «Ямал-Медиа» юне ма’’ламбада Лариса Окотэтто «Учим ненецкий» проектам’ минре пясь.
Время для чтения ~ 2 минуты
Пыда ненэцие ненэй вадан’ тохоламбаӈгу. Хэм видео сертабаӈгу. Тикыда ю’’ минутари’ минда’’, сидя си’’ивхана ӈопой ӈадиберта’’. Тохолкодахана видео манэсарць илека ӈэӈгу. Телевизорхана манэць нибта тэв’’, интернет’ мутравна ӈани’ манэтада. «ЭтноАрктика» страницан’ тюӈга тараӈгу. Луца вадам’ мэтахарт’’ ненэй вадам’ тохоламба пиртадо’.
— Мале ӈаха’’на тарця видео сертаба пясь тасладамзь. Хар’’н нюни тохолаван’ харвавани сер’ ӈадимдевы сер’’ми. Пыдо’ ӈоб’’ мэта вади теневэйдо’, неновна таӈга лаханакурць нидо’ пирас’’. Урокаха’’нани нерня ненэць’ харта пыхыданда нямна лахана тохода. Таддикахад ненэця’ вада хурка ӈэвам’ намдаӈгу. Пунахав мале местоимения, глагол, прилагательной тамна ӈани’ ӈаво пяӈгу. Ханяӈэхэ’’на вэнзер’’ лаханана намдасетыдм’. Ӈопой ненэця’ ед’ тарем’ вунин хонаркод’’: «Сяйндада’’?» Мандан: «Сяйндан?» Сидяха’ ӈэбти’: «Сяйндади’?» Ӈокари ӈэбто’ вахалтын: «Сяйндада’’?» Хусувэй яля’ няха’’нана’’ ханзер’’ лаханакува’’ тарем’ ненэцие тохоламбаӈгун. Вада’’ ханзер’’ сававна падыба таравам’ видеохана манэпаӈгудо’. Нюртей урокава’’ мале ӈась. Манзара нята’’ нини сертавэми саву’’ӈадонзь. Режиссер, монтажёр, стилист, вади падыбада, ненэй вади манэсарта, луца вади манэсарта ненэцяӈга’’на манзарадм’. Тикы’ хавна нядаӈгосядани невхы тохолцобця, словарь, книга мэ’’ӈадм’, — Лариса Омдевна лахана.
Тарем’ видео манэсартаханда ненэць’ янамбоковна вадамда тохолаӈгуда. Ӈани тэнз’’ хибяри’’ вадава’’ ӈобтикы хамэдамба пяӈгудо’, ӈамгэхэв’’ ялэхэ’’ мэта вадина’’ теневаӈгу’’.
Автор: Анна Яптик’ падвы
Фото: Л.Окотэтто’ тавы’’
