Няръяна Ӈэрм
Ненэциена’’ няд’’ма’’
Невхы иринато’ саирм’ нёдана’’ ӈэрм’ тер’’ е’’эмня хуркари илаӈгана тарана няд’’ми ӈадимдемби’’. Тикыдо’ ненэсяри ӈарка таром’ ха’’аврамби’’.
Время для чтения ~ 2 минуты
Нядэна ненэцяӈг’’ харад’ махалэй синд’’ми, хор, тамна ӈани тарана ӈавэ хардакохона иленаха’’ мипи’’. Мюсертаха’’ ватормы’’ ӈавэдо’ яӈга’’. Пыдо’ е’’эмняндо’ ӈу, еяӈэ сэдуванда ӈавэ тамби’’, ной’’, поӈга’’, лата’’, тамна ӈани’’ яёл’’ таня’’. Ӈокханда падаркана тарця няд’’маӈэ 23 ӈамгэ’’ пады’’. Бензинандо’ мир’ есям’, электростанциядамдо’ тамби’’. Тарця станциям’ харто’ тэмдаб’’нандо’ мирта’ пирувна есям’ няндо’ ӈани’ салдамби’’.
Тарця’’ няд’’ми ня’’марпавандо’ няю’ харе’’ хардато’ администрацияха’’ лаханабто’ тара. Пыхыдм’ пад’’махад хусувэй ӈамгэм’ закон’ сер’ ёльцяӈгананда тамбидо’. Небо’ округханана’’ самляӈг ёнар’’ мяд’ тер’’ тарана ӈаворидамдо’ ня’’амвыць. Тюку по’ Шурышкарской районхана тев ёльцяӈгана мале няхар’’ юр’’ хибяри’’ ӈаворидо’ ня’’амвыць. Маянд’ еремы’’ ненэця’’ ӈани’ нись ӈатен’’ няд’’ми хось пирӈа’’. Тикы’ хавна спутниковой телефон мипи’’.
2021 поход лимбя’ иры’ 1 яляхад округна’’ ӈэвахы ерв’ ватовна ӈока нюсавэй мяд’ тер’’ мятамдо’ ня’’марпи’’, мято’ тэри мяра тараӈгу. Хусувэй ӈамгэда тас, хансавэй таня’’. Есяхана таслаб’’, мирта миллион’ пеляӈэ харва. Ӈарка яна’’ тиӈгывна тарця няд’’ма ханяхартана яӈгу.
Автор: Марина Яр’ падвы
Авторы
Няръяна Нгэрм
Темы