Няръяна Ӈэрм
Ненэця’’ вадавы илебця’’ су’’ляко
Нилявко харта вадавэда ӈавка яхадекода су’’ляком’ хованзь ятна. Пыда ӈадьбата пи’ тахана нисянанда ты ерамба ядэрӈа. Тюку нарана ты’’ ниць иры’ ӈули’’ теци, ӈокаваханандо’ хад яля’’ пили’’ пон’ ӈэсьты’’.
Время для чтения ~ 4 минуты
Ӈобӈгуна хубтахана, хананда ниня юседанаханда, хаерад’ няю’ сядоць Нилявко хонаравы’’. Лакри’ ӈацянда тёрм’ намда:
— Ханяна хаян! Ӈавка яхадекор сулякода соявы, таля’’, манэкарт’’!
Нилявко хананда нид минханда санэй’’, нисянда няна сюрамба хая. Яхадеконда ховы су’’ляконда тарта ӈули’’ париде, небянда хэвхана тамна сыра’ ниня ваны, ӈэта ни’ сабе нулкарта ныхыда яӈгу. Яхадекода тикарихина суюкоцянда хэван’ тэвы’’, тикамда нямюхананда ӈули’’ нянзада. Тикы’ пуд су’’ляко ӈэта ни’ нусь ха’’мы. Пыда ӈэкцида тамна варето’ нунараха’’, выяӈга’’. Небянда тикан’ тэвнан’ ёльце туролы’’:
— Ав, ав, ав! — тарця мулида со’’.
Яхадеко ванхая’’, нюмдя ӈамянанда ӈавламба пяда. Су’’ляко ӈамямда ӈораць тари тэварида халмана. Нюндя ӈорма ямбан’ небяда таӈга хэвнякумна сырӈа. Су’’ляко ӈэта ни’ тад тикад ӈамгэрт вытюсипой’’ харта ӈани’ нулъй’’. Ийко сулякомда ӈудита ни’ илван’ харбила. Ӈацяда ситя табла:
— Ябтан таӈгая, сую хунахарт ӈудаха’’на нёд ня’’марпасьто’, небяда, ненэця’ ӈабт намда, тикарихина ситя тыбарта. Су’’лякор ӈорципой’’ тари хаӈгу, небянда ситя хае’’мяхад. Ӈамгэ маяӈгоди тад нерня’ харти’ ӈобнзер’ мэтыди’. Пыдар тари тайкуд лэтрамбахаюн’’.
Тарць’’ вади намда, Нилявко су’’лякоходанда хэвня’ хая, ӈавка яхадекохонда няньнда ютекэцям’ миӈа.
Сян яля’ хэ’’мяхад, су’’лякода ӈарка ты’’ помна харта няватарӈа, пуняхартана вуни хаюр’’, небянда ирня нявата тэварида паллы.
Ийком’, нарма’ няна, ӈацяда ӈэдалё тохоламба пяда. Ты’’ поӈгана пи’’, ялэ’’ ямбан’ су’’ляко’’ етри’ ӈадиберӈа’’. Хаерта тю’’у’ няри’ миӈа, нум’ нярахана ӈамгэхэрт тир яӈгу. Ийко сидя хабцем’ мэць нисянда пумна харта ӈэдалы. Тэхэти’ тэвыхы’. Нисяда тарем’ ма;
— Ийкоця, ханар ӈоб’’ ян’ сярад, су’’ляко манэ’’манзь хэхэни’. Пи’ тяха’ ӈани едэй’’ сую’’ ӈадимы’’ ӈэӈгу’’. Ты’’ помна Ийко сэврида мэ’’ӈа. Ялян’ ӈадимы’’ су’’ляко’’ небянато’ хэвхана туроць сюра’’. Ӈамгэ’ ёльцяӈгана Ийко харта ӈылбад падвы яхадеймда манэ’’ӈа. Тиканда хэвхана ӈари’’ тедэй ӈадимы падвы су’’ляко тет ябта ӈэнда ниня варета ну. Ӈули’’ сомбойкоця. Хэнакабтада су’’лякомда манэць, Ийкоця таня’ сюрамба хая. Су’’лякомда ӈудита ни’ ня’’амван харбилада. Нисяда пу’ някуна миӈа. Нянда сюрамбада хасава ӈацекым’ манэтаханда, су’’ляко варета нувэраха ни ӈа’’, небянда тяхамна сакада, ӈамгэрт мале ня’’амва’ то’’олха ни ӈа’’. Ийкоцян’ нисяда тарем’ ма:
— Ебцотаков, су’’лякомд нёр ня’’мар’’, ӈобат ӈабт нянанда хаёда, небяда тад тикад тыбартада, хаеӈгуда.
Тарця’’ вади’’ пуд, Ийкоця су’’лякоходанда хэвня’ хая, тайкуд тари маниеда, янамбовна письӈа, нявотарта тэкоцямда мание.
Тикы пихина мале ӈока су’’ляко’’ ялян’ ӈадимы’’. Ийкоця сидя хабцем’ мэць, ты’’ вар’ нямна ядерӈа, нисянда пумна. Хурина су’’ляко’’ тарем’ нёховаб’’ лэтрамбю’’, ситя ӈаман харвана’’ сармик’’ ӈока’’: нохо’’, тёня’’, варк’’. Ӈадьбята сямян ӈэсы’ тер’’ суюндаӈгова’ ёльцьӈгана таӈгм’ ни’’ хомбю’’.
Автор: Раиса Яптунэ’ падвы
Авторы
Няръяна Нгэрм
Темы