обновлено: 03:44, 25 августа 2023
Няръяна Ӈэрм
Неняӈг нина’’ пилюс’’
Неняӈг’’ иры мале ӈахакуна ваерась. Саць сата паӈомдо’ выӈгана мале мэ’’ӈадонзь. Тарця ӈэбта ӈод’’ ӈылекына’’ мер’ сусаванда’’ ни’’ ӈа’’. Пилю’’ иры’ пудана’’ ялэ’’ ӈэсонд’ тиртакудо’ тамна таняӈгу’’.
Время для чтения ~ 4 минуты
Мараӈгы, лынзерми, ламдо ма’’ламбава’ маляӈгана етри’ пэдакабтёда’’. Неняӈг’’ нинд тэри лабцеӈгаӈгу’’. Мяканд тэв’’махаданд ӈудид, сят ӈарханда сятормы’’ ӈэӈгу’’. Тикыд «Фенистил» пардонхана масар’’марихиданд яка ӈэвадаӈгуд’’. Хой’ няна ту’ ни’ ядемдавы нярцохона пэрцетына’’, ӈарка якдидо’ ӈотаӈод’’ хэсеты’’.
Пур’’ якы ты хаселабтамби
Епдяха’’на тына’’ ӈобтарем’ хуркари’’ ӈамгэхэ’’на нядабасетына’’. Саць я’’авлада’’ неняӈг’’ ёльцяӈгана нямдодо’ нохо’ юркана масабина’’, е’’эмняндо’ пурм’ сертабива’’. Пэдарасьда яхана иленаӈэ тосаля парадамбива’’. Пэдарасавэй явна мюсерта’’ нина’’ пур’ ӈэсяӈэ бочка’ пелям’ мэ’’элвыць. Наре харад’ тер Евгений Окотэтто тыда неняӈгахат тарем’ лэтрамбида.
— Тарця мутрам’ Хаби’’ я’ няд манэ’’ӈаваць. Тува’’ хэвняна ни ханас’’, нуна’’ ты’’ ӈэдо’ нидо’ парадамбю’’. Пур’’ма’’ яӈга вад’ мюня ӈа, ханяӈэхэ’’на ядувнанда са’’нюй нярцо лабас пэрӈава’’. Посава пяха’’на пятабина’’. Ханяӈэхэна няӈоць ляд’’мы ӈаябэй пэвдё мэ’’ӈава’’. Пини сыра’, нара’ някуна хамэдамбин. Хусувэй мядырман’ ӈахакуд тэврамбин. Ту’ табцада’’маӈэ тэ’’, сябартя’’мя’’ тарасеты’’. Якэни паль’’ ӈэва’ е’’эмня туми ябтёй нярцохона синдабив. Мерцяда ханяд ӈа, ӈэсями таня’ ӈабтамбив. Туми саць лэёмоӈгаданда, мерця посаваӈгаданда, хабтёваӈгаданда етри’ маниесетыв.
Неняӈг’’ иры’ нюртей’’ яля’’
Таддикахад епдя’’ пэва’ нерцю’’ тыта нусь ям’ хамэдамби. Вад’ тотрев’ ямб паллёда пида, ӈарка ненэця’ лы’ пирувна сертавыда таня’’. Тю’’уйда ӈобт’ вэтавы пяха’’на мэвы. Ниямда дарнитхана, пересинхана (парасинхана) есебида. Синд’’мянда перева’ е’’эмня вад’’ пяха’’ еся тебха’’на мэйрамбида. Пин’ тарпаван’ харвана ты нензел’’мана ханяримна тарпа пир’’ӈада.
— Яханана’’ яра я яӈгу, ӈадьбята мале ӈахакуй’’ похо’’на яӈга нусь ядамдо’ серта тасладамзь. Теда’ хусувэй по’ неняӈг’’ ӈадима’ ёльцяӈгана таралаӈга. Паддена’’ ты’’ мюнянда таӈга ва’’ны’’, сояда’’. Ӈани’’ пелдо’ пихина нусеты’’. Неняӈг’’ мюнда ма’’лёваӈгад мерця’ няӈы панамда тю’’у’ илабасетыва’’. Тарем’ мэб’’нандо’ якэн’ мер’ тухурӈа’’, тикы’ хавна хараси’’ ям’ вуни’’ танпю’’. Едэй ян’ ямдабана’’ мядэхэнана’’ хаёда, тад тованда похона яӈор’’ мэтава’’.
Едэй пюбарпада пардон
Евгений тюку по’ едэй пардонм’ мэць пявы. Нюрте’’э яӈга пюбарта мэта ӈэся’ мю’ икана тахарамбида. Пуна тыта ядэрман’ мяд’ няби вад’ хэвхым’ ӈарханда пюбарпида.
— Тосакабтёда ӈамгэ, ӈадьбята сят, ӈудид лэтрамбада ембдяр’’ мэць серо’’ӈа. Ханяӈэхэ’’на сэвхат, сяканд тебабата лакри’ икана халтамбада. Ям’ пардонхана мэ’’махад неняӈг’’ тянёворӈа’’, ты’’ ни’’ сюр’’, хасена ну’’.
Нямэхэна маркана илена’’ нини «дымовой шашка» ӈэдараць. Тедари’ тамна нинась мэс’’, хурка’’ ӈэдакы’’. Ихинани тарси’’ нюдякоця’’, пэдарасавэй выӈгана тародо’ яӈгода. Маси’’ нердена неняӈгаха’’на, «навес» мюня мэп’’, сава’’ ӈэӈгоданакы’’.
Пэдаравна мюсерта’’ ненэця’’ неняӈгадо’ тарем’ пирдалембидо’. Пудана’’ похо’’на нумда етри’ ядемдана, ӈадьбята ты пэртя’’ илаӈгана сямян едэй’’ ӈамгэ’’ ӈадиберӈа’’. Ямал’ тер’’ тыдо’ лэтрамба мэ’’эйдо’. Пэдарасавэй вымна мюсерта’’ нина’’ несэйвана иле тоходана’’
Автор: Анна Яптикы’ падвы
