обновлено: 03:45, 25 августа 2023
Няръяна Ӈэрм
Нерняри’ ӈа
Тюку илаӈганана’’ тохолкода’’ ӈацекына’’ хуркари’’ пирдырмаха’’на пыхыдадо’ манэ’’лабтамбидо’. Тарем’ Тюменской область’ няна «Топ-100 ПРО-Активных студентов Тобольска» проект таня. Сямянхат варемдо’ мэти’’ Тобольскхана тохолокоди’’ е’’эмня ӈадимдембидо’.
Время для чтения ~ 2 минуты
Хэвы иры’ пудана’’ яляха’’на нерня’ хэвыто’ нюби намдаваць, поӈгандо’ маня’’ округна’’ тер еремысь. Илебей’’ ненэцие’’ ӈарка яляхана хардандо’ кремль’ хэвхана ма’’лёвыць. Марад’ ӈэвахана мэнахад, проектм’ минренахад Дмитрий Лаптандер яӈга ненадумда’’мам’ ня’’амвысь. Сямянхат юр’’ ва’’лёй’’ тохолкода’’ поӈгана нябимдей ян’ ха’’амвыць. Небой по’ ӈани’ пыхыдамда хорпавы, ӈопой’’ 60 ӈэвы.
Дмитрий тетимдей по’ Д.И. Менделеев’ нюм’ мэта институтхана ӈацекы тохоламбади’’ манзаям’ торомдамби. Белоярск’ тер, таняна школам’ ёльцебавы. Нида ты пэртя’’, тедалахана вымна мюсерӈа’’. Сита лаханако ня’’ӈадамзь:
— «Си’’ми нерня’ мэвадо’ ихинани ёльце сава. Хуркари’’ ва’’лёй тохолкода’’ ма’’лыць. Хусувэндо’ теневабцода я’’авлыць. Няха’’на сыраць хуркари ӈамгэхэ’’ тоходанаваць. Хусувэй хибя ихинанда пойда серм’ тэрабись, таддикахад харта проектамда падыбись. Тюку пирдырман’ ерема е’’эмня сававна тохолко тара. Ханярина яля’ няю’ ӈэда’’ серка’’на нядаӈго серо’’ӈа. Мань несэй ненэцие торомдадм’, едэй’’ ини ядэрабцо’’ ӈадимя’’. Тедахав’ тамна’ тяха’ вареми мэтадм’.
Тарця’’ серо ӈадимдембава ӈули’’ тарана сер’’. Тохолкода’’ ӈацекы’’ нерняӈы иланд’ пыхыдадо’ хамэдамби’’. Сава нядамдо’ хомби’’. Пуна тикы нито’ ня’ сяхари’ ӈобанзер’’ манзара пиртадо’.
Автор: Анна Яптик
