Няръяна Ӈэрм
Нешади’’ дяԯя
Ныптакомантуӈ мэт ӈука тэмс неша’’ ӈомаш’’. Пуровский’ районхана каԯьтуӈ дяханатуӈ дискат диԯина’’ нешади’’ дет тасёта дяԯям’ «День коренных народов мира» мэӈаш’’. Чадю’’ нешади’’ тэмс дет ӈайта дяԯям’ Таԯкахана ӈайта «Прибрежный» паркхана мэӈатоньш. Праздникан томээ’’ хома шоньшахана ӈокна ныптакуш’’. Таԯкаӈ чеԯ’’ камна Каԯясамэхэт, Каԯпюԯкат, Самбуԯкахат мэна’’ неша’’ тадямэӈаш’’.
Время для чтения ~ 3 минуты
Чики дяԯяхана культурахана мансԯанна’’ куԯкаԯи’’ мероприятии’’ шеԯтаӈаш’’. Культураӈ дет тасԯёта учреждении’’ чупей’ нятакуш’’. Праздникхана мэна’’ нешади’’ хыниԯмаӈ, дюньшиԯемаӈ мэты’’ вильта концерт’ «Голос предков» ӈычимчеӈаш’’. Кынута’’ шанат тэмс нешади’’ ватамана куԯкаԯи’’ кынсу’’ мэӈаш’’. Таԯкахат мэна’’ артисту’’ поӈкна Самбуԯкахат, Каԯпюԯкат томы’’ кынуӈаш’’.
Чикиӈ камна «Традиция и современность» нимита конкурс’’ шеԯтаӈаш’’. Неӈи’’ хятмайтуӈ паныдётуӈ ӈычимчеӈаш’’. Ӈопшеԯы чет’ дют ӈок ни’’ мянаԯяш’’. Кимя меԯь ӈаймям жюриӈэ мэна’’ тасԯымпитоньш. Ӈаԯка нешаӈ таӈичохона мэта паныдю’’ дет ӈайта номинацихина ӈайвахай местам’ Красноселькупхат томы Анна Лазямова канаӈаташ. Каԯтыхина мансԯаш мэта’’ ӈаԯка нешади’’ дяԯнасу’’ хятмы’’ поӈкна ӈайвахай местан Таԯкахана диԯина Анастасия Алфёрова ка’амдяш. Пимня мэта ӈаԯка нешади’’ паны’’ ӈычимчемпючи’’ поӈкна Самбуԯкахат мэна Марфа Няруй нэхэԯяш. Ӈашки паныдю’’ дет тонԯамы номинацихина мянаԯьш ӈайвахай местам’ Нина Няруй канаӈаташ. Хаԯяӈкаԯтыхит томы мячинтатоӈ Клавдия Аверьянова шеԯкта ӈайта «Приз зрительских симпатий» няамӈаш.
Чикин камна мянаԯта’’ паӈкаԯмайтуӈ ӈэптутуӈ ӈычимчеӈаш’’. Кимяӈ ӈэпт хома ӈаймям жюри хампԯяӈк’ номинацимна’’ тасԯайтоньш. Праздникхана каԯьтуӈ ӈутаханантуӈ шеԯтамайтуӈ ӈамыкутуӈ ӈычимчемпюта’’ тадямэӈаш’’. Куԯкаԯи’’ ӈамыдю’’: шана’ку’’, сувенир’’ шеԯтапёш мастер — классхана тохотана’’ ӈукаш’’. Ӈашки’’ шана’комаӈ мэт дета ӈайта площадкам «Торова» шеԯтаӈаш’’. Куԯкаԯи’’ шана’кохона’’ шана’кош ӈашкиуде’’ хомана майпиш’’.
Кимя’’ татман ха’ӈа’’ Пуровская медиагруппаӈ мят чуштуш’’. Тай’’ня чики таттамытуӈ ша’’мнатоӈ ԯаткум, ваӈкулям ӈай ӈыди сувенир’’ шеԯтаман хапнантоӈ, Пурмедиа таԯьшаха мячисэтуӈ шеԯташтуш’’. Чики дяԯяхана ӈука мероприятии’’ тадяӈаш’’. Шанат тэмс нешади’’ культуран тонԯюта центрхана мансԯана Мария Вокуева проекта «Этно-слёт» мэӈаш. Пыта чуки похона Росмолодёжь шеԯтамы конкурсхана нэхэԯяш. Чикехей няаммайта веша’’маната ӈуп мят мян дедям тэмтамай, мастер-классу’’ шеԯтапёта нета’’ каптамай. Праздник’ хитамаӈ неԯьшуна ныптакош томээ’’ шиниӈкуй нешади’’ диԯивсомна каӈуԯонтнатԯям куйкон дяԯнас видяуди’’ шаԯӈаш’’.
Праздникхана мэмы’’ нешади’’ ватахана тэмстуӈ чадю’’ нешаӈкна таԯьша дяԯя таԯаӈа. Ӈопт ӈомшту’’, нетуӈ манэшту’’, каԯьтуӈ ватаманантуӈ поӈкнатуӈ мунушту’’. Ӈамыԯихина таԯьша, шаӈкмян тэмс неша’’ каԯьтуӈ культурамтуӈ, ватамтуӈ ӈокна ԯэтԯампютаӈатуӈ, чикехена ӈаԯтана ӈашки’’ ниԯинатуӈ катанатуӈ минԯемы шиниӈкуй дилм нитуӈ дюԯан.
Автор: Лариса Айваседо патмы
Авторы
Няръяна Нгэрм
Темы