обновлено: 04:45, 22 декабря 2023
Няръяна Ӈэрм
Невхы ила’ саирм’ теневана’’
Хахаяда яля’ Салехардахана фольклор’ нямна манзарана Экспертной Советхана мэна ненэця’’ тасалкурӈаць. Пыдо’ по’ ямбан’ манзаравандо’ хавна ва’’лёй лаханакурта ненэцие тэрабиць.
Время для чтения ~ 3 минуты
Ямалханана’’ фольклор’ нямна манзарана Экспертной Совет юкад вата самляӈг поданда тюку по’ хаясь. Таӈок по’’ ямбан’ няхар’’ юкад вата ӈобт’ тэвормы’’. Ӈоб’’ мэва тамна Приуральской районан’ ӈэдалёрмы’’. Таняна пэ’’ тер’’ культурандо’ серо ханзер’’ нерня’ тидхалембавамдо’ манэ’’лабтамбавыць. 2012 поход юкад вата няхар’’ проектм’ нерня’ мэвы’’. Тамна 93 ненэцьм’ тэравы’’. 2016 поход «Мастер фольклорного жанра» нюмам’ тодо’ тэнзувана ненэй ненэця’’, хаби’’, тасу хаби’’ няхар’’ ва’’лёй ненэцяӈг’’ похона мипи’’. Округханана’’ тарця нюмам’ 23 ненэця’ нямась.
Экспертной Советм’ няд’’мяць невхы илна’’ саирм’ лэтрава’ е’’эмня едэй няд’’ма’’ ӈадимяць. 2022 похона январь иры’ 1 яляхад манзаралъядаць. Илебей ненэцие’’ нидонзь юр’’. Харе’’ вадидо’, невхы иландо’ саирм’ нерня’ минревандо’ е’’эмня сидто’ ӈани’ ненадумдаби’’. Нерня’ ха’’амвы хибяри самляӈг ю’’ ёнар’’ есям’ нэкалць пирта. Тикы’ няю’ сидя еся премиям’ таслаць. Тюку яля’ пиркана тет яна’’ тер’’ тарцям’ ня’’маць. «Мастер фольклорного жанра» конкурсхана нерня’ ха’’амвы ненэця’’ самляӈг ю’’ ёнар’’ есям’ нэкалпи’’. Организация ӈэбата грантандо’ еся — сидя юр’’ ёнар’’ ӈэсь пирӈада. Ты’’ саполана ирыхына Советхана тарем’ тасладонзь, Салехард’ хавна тамна ӈани’ хардахана тасалкубидо’ мэць пиръядо’.
Теда’ ма’’лёвандо’ мальӈгана тасалковамдо’ мэ’’мандо’ нерня Пуровской районхы тодо’ тэнз’’ культура’ хардахана манзарана’’ грант’’ есь ханзер’’ садмамдо’ ваде’’ӈаць. «Семь цветов радуги» конкурсандо’ хуркавна хэвам’ тензебтембиць.
Тюку по’ «Мастер фольклорного жанра» нюмам’ ня’’амван’ харвана тянёри ӈэвы. Тасалковахана ненэй ненэцие’’ поӈгат Сэротэтто Терко Ёловичм’ нерня’ мэць. Лаханакула, ненэй ненэцие’’ ила’ саир’’ нямна ӈэда серо’’ тяхасовна теневыда. Пыда Ямальской районхы Яр-Саля’ тер. Мэ’’мы сёда «Лохортадрев’ сёна’’ хайная’’!» нюбета книган’ мэвыдонзь. Хаби’’ няхатана’’ Галина Гавриловна Артанзеевам’ ненадумдаць. Тасу хаби’’ нина’’ Сильвестрова Людмила Дмитриевнам’ тэраць. Пыда ӈобтикы ва’’лёй.
Тарця’ пом’ ӈэрм’ тер’’ ила’ саирм’ тасламбада’’ мэ’’ӈаць.
Автор: М.Яр’ падвы
Фото: М.Яр’ тадтавы
