Невхы иле’’мям’ тенева’’

Нямэхэна Салехардава’’ «Город трудовой доблести» едэй нюмам’ мэць пясь. Тикы’ няю’ фестивальм’ сертабиць, невхы’’ сайнорма’’ по’’ мальӈгы илам’ ваде’’ӈаць. Тамальӈгана мал’’ нядаӈговы’’, хибяхав халям’ хадабавы, ханевы, ембдяро сэдыбавы. Предприятияха’’на манзарана’’ таӈгхад ехэравы’’.

Время для чтения ~ 3 минуты

Нерня’ ненэця’’ концертм’ маниець. Марад’ ӈэвахана мэна ерв вадамда хэтась: «Саць ненадо маркана илева’’. Маня’’ хардана’’ хавна Полярный круг нюбета яхана ӈэда яӈгу. Теда’ ӈани’ ӈопой ӈарка нюмда ӈадимя, тикы сидна’’ тамна ханяцей’’ пуномдамби. Тарця нюмам’ мэ’’мава’’ хусувэй яна’’ терхад минда сер’’. Ӈавна иринана’’ таро ӈани’ я’’авлавы, пыдо’ илна’’ сава ӈэва’ е’’эмня варемдо’ мэ’’мы’’. Неноховавна ява’’ лэтрамбавы’’, тоенана’’ по’’ ёльцяӈгана сямян таняна ныхымдо’ садпавы’’».

Сё мэтаха’’ инзелева’ хавна яӈга лохо’ мюня хуркари сава серо минрець. Ханяӈы’’ ларасакодамдо’ мимбиць, ихибцяито’ хэрнари’’ соць. Сяхаӈгав’ бондарно-ящичный цехахана халэ’’ ӈэси, сэрабтаӈго мэта ед, ханюй халя’ ларасад мимбавы’’. Лар’’ яха’ вархана ӈэда лесотарный заводхана манзаидо’ ӈударихи’’на сертабавыдо’. Сайнорма’ мальӈгэхэна ненэциедо’ тянёлереӈгавы’’, тикахад тарем’ ӈод’’ планамдо’ томдабавэдо’.

Сидяӈг: А.Яптик’ тадтавы

Лыӈгарё мэта поӈгам’ паӈгалпада’’ ӈани’ тэтнаць, хэвандо’ ӈэсонд’ манзаямдо’ ёльцедонзь. Паӈгалтавадо’ хайна миӈась, баянхана сянакода сидя хасаваха’ сиддо’ тарабтамбада то’’олхаханзь. Падтаӈгода’’ ӈацекы’’ ӈобтикы нянди’ инзеле падтаӈгурӈаць. Толаӈгулава’ хардахад ӈэда’’ не’’ ненэцие падна тохоламбиць. Невхы’’ похо’’на мэ’’мы паднабцяӈгана ява’’ лэтрамбадаха’’ письмо падыбиць. Ӈахат печатной машинам’ ӈадимдембиць, паднана тэтнавы, таминда тид’’ паднабта таравы.

Ява’’ лэтрамбада’’ е’’эмня таславы лохо танясь. Хусувэй хибя СВО’ няна мэнаха’’ ӈамгэхэв тарана ӈамгэри тэвра пир’’ӈась. Ява’’ лэтрамбади’’ мяд’ тер’’ Советхана мэна’’ харе’’ ӈудаха’’на сэдвы ӈаво мирдапиць. Ма’’лавы’’ есьдо’ яндо’ хэвняна мэна няхато’ ӈэдараванзь пэръядонзь.

Тарем’ Салехардаханана’’ ненадо’ серм’ ядабтадонзь. Тад нерня’ тикы нюм’ няю’ ӈани’ ӈарка таром’ ха’’аврамбаӈгува’’.

Анна Яптик’ падвы

Авторы

Няръяна Нгэрм

05:33, 03 февраля 2025

Темы