Няръяна Ӈэрм
Нипы’’ дяԓям мэӈаш’’
Няпы’’ тумахат, шиниӈкуна капи’’ чиԓта’’ халаку’’ дет’ ӈайта дяԓям мэштомай’’. Неԓьчеэй катамайтуӈ шеcв няпымтоӈ ӈуп ӈаԓка детан пиԓештомытуӈ. Халакутуӈ ӈамса’’ пимахаты’’ каӈуԓонташ чепяштомай’’. Чики дяԓяхана поӈкнатуӈ шана’ко мянаԓьштомай’’
Время для чтения ~ 3 минуты
Капи’’ — тэмстуӈ чадю неша’’. Маня’’ дяханана няхаԓ дюԓ’’ ӈок капи’’, ӈукадёмутуӈ фактории Быстринкахана диԓиӈа’’, Пуровский’ Толькахана. Кукитоӈ ненэй мякна, токуши’’, дяку’’ кcвхана диԓе’’. Каԓиташту’’, каньдяшту’’. Шиниӈкуй ӈытаԓметуӈ дилм, каԓьтуӈ культурамтуӈ капи’’ хомана ԓэтԓымпитуӈ. Чейня капе’’ чиԓта’’ халаку’’ дет’ ӈайта дяԓям мэштомай’’. «Чиԓта’’ халаку’’, няпы’’ тоӈа’’ — нума таӈичумты», таԓям капи’’ маньштомай’’. Таԓям четаӈ капиди’’ шиниӈкуна мэштомы дилм ӈаԓтана’’ ӈашки’’ чедимямаӈ мэты Пуровский’ районхана нипы’’ дет ӈайта праздник’ шеԓташту’’.
Чуки похона неԓьня капиди’’ кайвюча дяԓям Таԓкахана мэӈатоньш. «Прилёт уток» нимита нипы’’ дяԓян ӈука тэмс неша’’ хыниԓмантуӈ мэты’’ тоӈаш’’. Чуки похона няпы’’ тома’’ дяԓям нешади’’ дет тонԓюта центрхана мансԓанна’’ хомана шеԓтаӈатоньш. Капиди’’ праздник’ дёԓьше вильӈаш. Капиди’’ ванԓмана куԓкаԓи’’ обряду’’ ӈычимчеӈаш’’. Шеcв тум тавстаӈаш’’, шеcв няпым пиԓиӈаш’’, няпыӈ дюԓкна тун каӈуԓонтӈаш’’. Детхат четмайтуӈ няпы’’туӈ выдиӈ пеԓям шеcв кычан четхадя’’, куй’ку ӈыԓ камтадятоньш. Вяптуӈ тадя ӈаймя мэт, дилтуӈ тат неԓьняӈ хома ӈаймя мэт, таньше понантуӈ капи’’ каӈуԓонташтомай’’. Центрхана мансԓанна’’ капиди’’ куше няпы’’ дяԓям мэштомам вачаӈаш’’, вильта концерт’ шеԓтаӈаш’’. Капиди’’ ватамана кынсу’’ мэӈаш’’, таԓаӈаш’’. Праздникан томы’’ ненэй мякна няпы’’ ӈамсахана’’ мячиӈаш’’. Кайвюча дяԓяханантоӈ капе’’ шиниӈкуй ниԓинатуӈ — катанатуӈ каӈуԓонташтомаӈ шеԓ куй’кохо’’ дяԓнасай’’ видяуди’’ шаԓӈаш’’. Ӈашки’’ поӈкнатуӈ мянаԓмаӈ мэты’’ центрхана мансԓанна’’ куԓкаԓи’’ шана’ку’’ шеԓтаӈаш’’. Ӈашкиуде’’ майпёш куԓкаԓи’’ шана’кохона’’ поӈкнатуӈ мянаԓяш’’. Ӈынхана дятоԓьш тохотаӈаш’’, шана’кош ваттахана каԓи’’ нямаԓпиш’’, ты’’ нямтхи’’ дюсни’’ нятпиш’’, няԓяӈпаӈк вяԓкуԓпиш’’.
Чикиӈ камна чуки похона ЦНКхана деты конкурс’, капиди ӈухуку’’ де’эмня ӈайта шеԓтаӈаш’’. Таньше мянаԓьш нэхэԓмы’’ тотуӈ мячисы’’ няамӈаш’’. Капиди’’ кайвюча дяԓям шанат тэмс неша’’ хома шоньшахана мэӈатоньш, нипы’’ дяԓян томы’’ хомана ныптакуш’’.
Автор: Андрей Пяк патмы
Авторы
Няръяна Нгэрм
Темы