Няръяна Ӈэрм
Нито’ хэвхана ныланаӈгу’’
Саво’’ ириян’ тэвына’’. Тев’ ёльцяӈгана по’ ямбан’ школахана тоходанавы’’ ӈацекы’’, ӈацекы’’ няюв манзаравы’’ ӈарка нидо’ янамбовна ныланаванзь тарпота’’.
Время для чтения ~ 3 минуты
Маркана тохолковамдо’ минревы’’, округна’’ ӈэсыхыт турта’’, хойхана мюсерта’’ ненэця’’ ӈацекы’’ маймбась мякато’ ӈэдалэйдаць. Хусувэй по’ вертолётхана мякато’ ханцеты’’, небянато’, нисянато’ мят’ сиддо’ тэврасеты’’.
«Школьной» нюбета тирта ӈано’’ тюку мэвахана ӈока ӈэсыхы’’ тэворӈаць. Тарем’ маркы А. П. Пырерка’ нювм’ нюбета школахана по’ ямбан’ тоходанавы’’ ӈацекы’’ сямянхат нюртейдо’ Пёша, Несь, Ома, Снопа, Кия ӈэсын’ хаяць. Пыдо’ пудандо’ Шойнан’, Хорей Веран’, Нельмин Салян’ тирта ӈано’’ ӈацекы хан’’лаць.
Каратайка’, Варнек’, Усть-Кара’ няна хойхана мюсерта’’ вы’ теркоця’’ таминдо’ нисянато’ мят’ тэвыдаць. Пуданаӈэ Краснойхана илена’’ хаяць, таняд няби яляна тэхэ’’на’’ мэна ненэця’’ ню’’ хой’ ня тийдаць.
Теда’ ӈацекы’’ таӈга’’. Няхар’’ ирий’ ямбан’ варемдо’ мэць ненэй мякана илеӈгу’’, небянато’, нисянато’ сей маймбтамбаӈгу’’. Хой’ тер’’ ӈацекы’’ ныланавандо’ сер’ хусувэй серкана ӈарка нидо’ нядабаӈгу’’. Хасавако’’ нисянато’ хэвхана тэхэ’’на мэӈгу’’, сую маниеӈгу’’. Тев’ ёльцяӈгана ханеванзь тэворта’’, халядаӈгу’’. Нисянато’ хэвхана хусувэй тарана манзаи пэрманда’’.
Не ӈацекы’’ ӈани’ небянато’ хэвхана сава нядаӈгодаӈэ’ та’ ямбан тараванда’’. Хусувэй мяд’ манзаи минреванда’’. Ӈавар пирембаӈгу’’, пядамдо’ мят’ тюлеӈгу’’, итамдо’ хосаяӈгу’’. Небянато’ хэвхана сэдораӈгу’’, надорта’’…
Мяд’ манзаяхад ныланавандо’ сер’ нюдяко нидо’ маниеӈгу’’, ӈобкана сянакода’’, толаӈгода’’, падтаӈгода’’. Та’ ямбан’ сертавандадо’ тянё ни ӈэӈгу’’.
Маркана илена’’ ӈацекы’’ ныланава’’ ӈани’ таславы’’. Няръяна маркана е’’эмняндо’ таӈы площадка манзараӈгу. Маркы тетимдей школахана си’’ив отрядхана сидя юр’’ ю’’ ӈацекы’’ нылаӈгуд’’. «Труд» нюбета олимпийской резерв’ спортивной школахана самляӈг ю’’ ӈацекы’’ ныланаӈгу’’. Спортхана ныхыта’’ хасава’’, не ӈацекы’’ е’’эмня хуркари’’ мэкад’’ программа’’, соревнования’’ таняӈгу’’. Тикы’’ поӈгана музеян’, кинотеатран’ ядэрта’’, няхато’ мастер-классхана харто’ теневабцудо’ манэ’’лабтамбаӈгу’’.
Округна’’ хусувэй ӈэсыхына ӈацекы’’ ныланава’’ ӈани’ таславы’’. Ханзер’’ таӈы ялэдо’ мэта’’, тикахад нерняӈы тохолковадо’ переӈгу.
Автор: Юлия Талеева’ падвы
Авторы
Няръяна Нгэрм
Темы