Мянаԓьш шана’коӈа” | «Красный Север»
0°C

Няръяна Ӈэрм

Мянаԓьш шана’коӈа”

Ха”моԓьш мянаԓяш», вяԓкуԓоԓяш», шуԓвиԓяш», тупкам ӈятпиш». Мянаԓмантуӈ мэты Таԓкан пиԓи нэхэта», нюӈк, ӈашки» ӈомаш». Чики каԓтыхина Северное многоборьеӈ дет тонԓюта турнир Пуровского района мэӈаш».

Время для чтения ~ 3 минуты


Кашем’ дюԓ ӈок спортсмен мянаԓмантуӈ мэты тоӈаш». Таԓкахат мэна» спортсмену» камна Самбуԓкахат, Каԓпюԓкат, Тазовский районхат мэна» тадямэӈаш». Шана’кота» Северное многоборьен дет ӈайта» хампԓяӈк спортхана пытатуӈ конуԓпёш няхаԓ дяԓяӈ мянаԓяш». Таньше шана’кома нешади» дилхат ӈычимы. Таԓям выӈкат мэна» тохоԓкота» ӈашки» мянаԓьш шана’комам хашаӈоӈа». Ха”моԓьш вяԓкуԓоԓьш, шуԓвиԓьш, тупкам ӈятпёш мянаԓьш дёԓьше пимши». Кукят чуки спортан каԓьтуӈ вимнянтуӈ томы», кукят шичитуӈ тохоԓампюта» тренертуӈ маныдеш таньше шана’кош чепьмай». Куптат тохоԓкота» ӈашкиуди» мянаԓмам хомана каматымпи».

Сидяӈг: Лариса Айваседо тадтавы
Сидяӈг: Лариса Айваседо тадтавы

Неԓьчеэй дяԓяханантоӈ мянаԓта» няхаԓ ха”амхана ха”моԓьш мянаԓяш». Соревнованихина пытатуӈ конуԓпёта» пиԓи нючаудитоӈ кашем’ дю» потуӈ. Ӈашкиуде» хомана нюӈкмана мянаԓяш», каса» ӈашки» поӈкна не» ӈашкиуди» чепиԓяш». Няхаԓ ха”амхана мянаԓмантуӈ путы кану» ха”муԓпёш чепьӈаш». Дю» ӈупкэйван ӈамтамы» кану» нимня хамуԓяш». Ха”муԓпёмытуӈ кану”тоӈ тотуӈ пиԓсатуӈ. Нюча» ӈашкиуди» хамуԓпёта кан» ӈамычеэймана пиԓьша» ни’ӈа». Ӈаԓка» нешади» поӈкна пиԓи ӈука» каным Тазовский районхат мэнахаӈ спортсменхиӈ ха”амӈахаӈ. Владимир Пяк шича дюԓкат ва’та чет’дю» шича кан» ха”амӈа, Юлия Молодых -няхаԓ дюԓкат ва’та шича дю» няхаԓ кан» ха”амӈа.

Нимимты дяԓяхана спортсмены» тупкам ӈятпёш мянаԓяш. Мянаԓьш мэта тупка шетши, шет’та -350 грамм дёԓьш. Таԓьша тупка шетшапта ӈотнаӈ, куптаӈ монана ниӈа. Куки мянаԓта» ӈайтамайтуӈ тупкатоӈ меԓьшаӈ пусыпётан пуняӈ тошту. Ӈашкиуде» чешчам ниш намтоԓ, хомана пимши», вяԓхантуӈ мянаԓяш». Нум пcмшаньш спортсмены» пям няампёш шуԓьвиԓьш мянаԓяш». Ӈуп, шича, няхаԓ -таӈ кун километран дёԓьшат шуԓьвиԓяш». Хыԓата дёԓя шехеԓыӈ кысумна шуԓьвиԓьш неньшаԓ ниӈа. Таԓям таԓьша соревнованихина четыдяӈ мянаԓьш тохотана ӈашкиуде» тэтнашту». Нэшаԓмантуӈ тайхана тренерутоӈ пон шичитуӈ ватахана чуувкуӈ падеԓьшту. Шича час дямпан соревнованитоӈ миньдяш.

Сидяӈг: Лариса Айваседо тадтавы
Сидяӈг: Лариса Айваседо тадтавы

Няхамты дяԓяханантоӈ мянаԓта» вяԓкуԓоԓьш чепьӈаш». Няԓяӈ паӈк вяԓкуԓпиш». По”омнатуӈ тасԓайтоньш, кимя шан кункана патԓата няԓяӈ паӈк вяԓкуԓпёш мянаԓмам.

Каса» ӈашки» поӈкна не ӈашки» вяԓкуԓоԓяш». Мянаԓта» няхаԓ’мэмаӈ тыншаӈотоӈ ӈятпитуӈ. Няԓяӈ паӈк нипнантуӈ вяԓк, няхаԓ папыткантуӈ пут вяԓкуԓоԓьш хиташтут.

Мянаԓьш хитамахататоӈ хомана шанакомы», ӈайвахай местам канамы» ӈашки» тотуӈ патаԓ — диплом, медаль няамӈаш». Ӈокна мянаԓмэхэты» няхамты местам Каԓпюԓкат мэна» канаӈатуӈ. Нимимты местан Таԓкаӈ чеԓ спортсмену» каманда каамдят. Ӈайвахай местам Самбуԓкахат мэна команда канаӈата. Хомана мянаԓмы» спортсмены» навэт ӈаԓка соревнованихи» кайны», таньняна мянаԓмантуӈ мэт.

Автор: Лариса Айваседо патмы


1

0

0

0

0

0



Темы