Няръяна Ӈэрм
Ной паныдо’ хамады’’
Тюку по’ нябимдей ирий этнокультурной центр’ проект «Паской ной паны» манзара. «Мел’’ манзарана» мякана не’’ ной паны сэдыби’’. Ненэцие’’ ила’ саир’’, ӈудаха’’на сертабада’’ тад нерня’ танява’ е’’эмня тидхалембададо’. Тарцям’ няд’’мяць сэдораванзь ма’’лавы’’ нидо’ ной паным’ сэдыба тохоламбидо’.
Время для чтения ~ 4 минуты
Проектхана мэна’’ хасую’’ не’’ машинкахана сэдора теневаб’’нандо’ тарась. Пыдо’ мале тетимдей ирий ной паныдо’ сэдаби’’, сиддо’ нядабада, тидхалембада Светлана Попова.
— ЭКЦ проектхана сэдорана’’ — тэтнана не’’, пыдо’ харе’’ манзаито’ пуд турӈа’’, хибя сяха’ пирӈада, та’ ёльцяӈгана ӈадиберӈа. Мал’ пэдава’’, ивъер’ сертабидо’, ёльцьӈганандо’ турцеты’’. Ныланава’ яляханандо’ ӈод’’ «Мел’’ манзарана» сэдорава’’ мякандо’ паромбасеты’’.
Хусувэй панэмда сэдыбада не харта ёльцяда таня, тикы нядаӈгода няндо’ ня’ яӈга таславы. Ханзер’’ нянандо’ серо’’ӈа, тамальӈгана турӈа’’. Поӈганандо’ Анастасия Бобрикова, ӈацьмбой некоця И.П. Выучейского нювм’ нюбета колледжхана тоходана, «Хаер’’» ансамбльхана мэ. Ивъер’ ненэцие’’ ила’ саирм’ нерня’ минрена, хари’’ вадамда тохоламбида. Мале ӈахакуд хари’’ ной панэта нямна ибедорцеты. Ӈобаӈгуна этнокультурной центрхана ной паны сэдыбава’ юнм’ намдавы. Тарця серт’ майвы’’, тарем’ проектан’ еремы. Ӈацекы ӈэванда мальӈгана мядонзэйӈэ хадахаданда ной паным’ ня’’амвысь, теда’ ной паным’ харта сэдыби. Сэдорава нянанда сямянхат саӈговота ӈамгэӈэ тасламбида, ивнанда ӈэда сер’’ ӈэдараха. Анастасия Бобрикова тарем’ лахана:
— Нертей мэва’ паным’ сэдабидм’, ими маймби, тохолкодава’’ сава не, ной паным’ ханзер’’ паркыба, сэдыба таравам’ манэ’’лабтамбида, хусувэй тарана серт’ сидна’’ тохоламби. Светлана Васильевна сидна’’ сомбовна мание — ханзер’’ сэдорава’’, ӈамгэм’ ханзер’’ мэсь таравам’ манэ’’лабтамбида, хурка мадавы’’ таня’’ вадецетыда. Ӈамгэхэва тарем’ нибта хань’’ таминда табекосеты. Сэдвэми панэми мале серван’ харвав. Тикы’ хавна нидами паӈгалман’ харвадм’.
Тамна ӈоб’’ сэдорана не — Наталья Канюкова, ДЮЦ «Лидер»хана, ӈацекы тохоламбада. Пыда мюсерта’’ ненэцие’’ мякана вадёвы. Нюдяко ӈэванда мальӈгана нябаконда нюделеревы нянда ерембата маймбасеты. Вадё’’махаданда харта панэнда нямна ида ядэрцеты. Наталья тамбир’’ ӈарка серм’ нертей мэва’ сертаби. Паныда ӈамдэ’’лаха, падта’’мида няръяна’’, тасехей’’, — сян’ яля’’ ваерась, манзаямда ёльцеӈгуда. Тарця паны Канин’ тер’’ не’’ мэцеты’’.
— Паным’ сэдыбава нензел’’ ни ӈа’’. Пили’’ сэдораван’ харвадм’. Тандая’ сэдвы панэми саць манэ’’ман’ харвав. Хусувэй яля’ турць пир’’мы ӈэб’’нани, ялэ’’ сэдораӈгудамзь, — Наталья Канюкова мась.
Проектхана ной паным’ сэдыба тоходанава’ е’’эмня есям’ салдамба ни тара’’, валакада нойм’, тамна таранадамдо’ не’’ харто’ тэмдаць. Сэдоравандо’ ёльцям’ харто’ тасладонзь, хибяхана ханзер’’ серо’’ӈа, сэдорава’ хардан’ турцеты’’.
— Ты’’ ниць ирий’ пудана яля’ пиркана не’’ валакада сэдора ёльцеӈгуд’’. Тикы’ хавна падкодамдо’, сюдортамдо’, нидамдо’ сертаван’ харва’’. Тикахана саць сава ӈэванда! — тарця вади нида нядабавы Светлана Попова хэтась.
«Паской ной паны» проектадо’ саво’ ирийхана ёльцеӈгу’’, не’’ манзаидо’ округна’’ ЭКЦ мякана манэ’’лабтаӈгудо’.
Автор: Юлия Талеева’ падвы
Авторы
Няръяна Нгэрм
Темы