обновлено: 07:04, 20 июля 2023
Няръяна Ӈэрм
Ӈобкана нерняри’ яда’’
Неняӈг’’ ирий’ 8 толыркана Россияханана’’ мале сян’ по’’ ямбан’ ӈарка ялям’ мэ’’ӈава’’, мяд’ тер’’ мэнева’, лэтрава’ е’’эмня таславы. Ӈавнанда тарця яля’ паӈгада ӈахы’’ похот миӈа. Маня’’ округханана’’ пудана’’ похо’’на’’ мяд’ тер ӈобкана ма’’ламбасетыдо’. Хибя тет юкад вата’’ по’’ ямбан’ хынёси’’ иле’’, нюдо’ сава хибяриӈэ вадавы’’, няндо’ медаль мипсеты’’.
Время для чтения ~ 4 минуты
Тюку по’ ӈод’’ Ненэцие’’ округхана ӈокханда 53 мяд’ тер’’ медаль ня’’маць. Наръяна маркана ӈарка дворецхана 11 мяд’ тер’’ ма’’лэйдаць, ӈокадо’ маркад ӈэда’’, Красной ӈэсыхыд товы’’ таняць. Поӈганандо’ Майя няби Пётр Лаптандерха’ мэӈаханзь.
Нерде округна’’ ерв’ ӈуда’ ӈылы, Александр Дударов вадам’ минресь, ма’’нисяв: «Пыдара’’ ӈобкана яда, нида’’ нядаба, сахарамба ямб илм’ мадавэда’’. Нюда’’, нюта’’ ню вадавэда’’, ханяӈыда’’ нюто’ ню мание’’. Ханзер’’ илм’ минре, ням’ нядаба, хусувэй серкана нерня’ минзь таравам’ харе’’ илаӈгананда’’ манэ’’лабтамбира’’. Тад нерня’ ӈоб’’ пон’ сававна иледа’’».
Тикы яляхана нюртей медальм’ «За любовь и верность» Майя Петровна, Пётр Егорович ня’’амӈаханзь. Пыди’ тюнямди’ 1981 похона мэ’’ӈадинзь. Ӈобкана тет ю’’ няхаромдэй по’ мэёвна Краснойхана илеӈаха’. Петр Егорович илеванда ямбан’ «Харп» колхозхана манзарась. Пудана сян по нылана. Пыда харта сава нядаӈгода, ида пили’’ мята тер’’ нямна нярканасеты. Ямда теневана ненэця’, ханена, ёрма’ серм’ харвобтана.
— Мань паӈгани’’ ӈарка яхад миӈа’’, Чёрной нюбета ӈэсыкоцяхана яв’ вархана вадыдамзь, тикаха Красноян’ илеванзь тэвываць. «Харп» колхозхана хуркари’’ манзаяха’’на мэсетыдм’. Та’ мальӈгана ӈуво маторпадаӈэ тарасетыдм’. Таняна Майями сэвтедамзь, ӈацембой некоця ихини мэёвна тебась, — невхы по ихинда ха’’аврась Петр Егорович мась. — Тарем’ мале 42 по’’ ямбан’ илени’. Нюни’ тюку яхана сояць, мал’’ вады’’, харто’ мяд’ терсавэй’’. Нара’ ебцотами школамда ёльцесь, нерня’ университетан’ тохолкованзь едты. Маня’’ ӈобкана нюдякова’’ нядабаӈгува’’.
Майя Петровна ӈобтарем’ илеванда ямбан’ «Харпхана» манзаравы. Ӈудида мэта не, мел’’мана сэдорана, хусувэй серо теневана.
— Мань хойхана соявэдм’, хойхана вадёвэдм’. Теда’ хардахана иледм’. Небями сэдора си’’ми тохолавы, ӈобкана ӈока ӈамгэм’ сэданинзь. Харта ӈамгэм’ тенева, тикан’ си’’ми табадамбасеты. Сэдвы панэмда тенад’ лэтамбив. Вадёван’ сер’’ Краснойхана сэдорана’’ не’’ понд’ еремядамзь, тарем’ сэдоралава’ мякана пили’’ манзарадамзь. Тиками ивнани ӈэсеты, харвабтавась. Хаӈгулавани сер’ хаевась, — янамбовна лаханась Майя Петровна’ вадамда ханада. — Сенз ӈэб’’нани тамна сэдораӈгудамзь. Небяни тохолавы манзаями етри’ минрев. Илаӈгана тарана сер’’.
Майя Петровна, Пётр Михайлович тет нюмди’ вадавэхэ’.
Тамна си’’ив по’’ ямбан’ няхар’’ евако ӈацекым’ пэрӈаханзь. Тюку яля’ пыди’ ябдана ири хадаха’, нюти’ ню пэртаха’. Мяд’ терсавэй’’ ӈобкана ма’’лёбнандо’ ихинанди’ маймбасетыхы’. Ӈобкана хоян’ тэворцеты’’, та’ ӈодиманзь, мараӈгыманзь, тудакуманзь ханцеты’’. Хуркари’’ серка’’на ӈарка мяд’ тер’’ ӈобкана мэсеты’’. Нидо’ нядаба нерняри’ миӈа’’.
Автор: Юлия Талеева’ падвы
