Няръяна Ӈэрм
Ӈобнзер’’ илева’’
Яханана’’ тодо’’ тэнзм’ мэта’’ ненэця’’ иле’’. Маня’’ помнана’’ илана’’ саир’’, вадина’’, хэхэн’ пунрёбцона’’ яӈга’’. Тикахад мал’ ӈопой я, Россия’ терва’’. Мал’ ӈокханда яна’’ ныхыӈэ тарава’’.
Время для чтения ~ 3 минуты
Тандая’ ӈарка яна’’ тиӈгывна хуркари илека серо ӈадимдець. Марка’’на, нюдяко’’ хардаха’’на харе’’ вадавнандо’ хынотаха’’ инзелець, ярмарка, пирдырми, тохолкова сертабиць. Ӈацекы’’ е’’эмня харе’’ ям’ мэнева’ нямна ӈэда акция минрець.
Округна’’ ненадо хардахана, Саляӈгардахана «Турнир дружбы» ӈась, волейболхана сянакуць. Марад’ ӈэвахана мэна ерв’ кубокм’ матопиць. Ӈокханда «Геолог» нюбета сёбар’’ мят’ 14 команда’’ ма’’лыць. Тарця’’ таняць: «Казаки Ямала», «Центр Азии», «Ватан», «Бирлик», тамна ӈани’’. Поӈганандо’ тет ю’’ тэнзм’ мэта’’ мэць.
Нерня пирдырманди манэ’’ӈаваць. Сянакованда’’ нито’ пумна яда ӈадиберӈаць. Харто’ ембдяродо’ сервыць. Хэвханандо’ нидо’, мядото’ тер’’ миӈаць. Ма’’лёвэӈэ няна’’ харад ӈэвахана мэна сава вади хэтыбись: «Маня’’ мал’ ӈобнзер’’ ӈэб’’на’’ тара. Теда’ ханяӈына’’ ява’’ лэтрамби’’. Тайна ӈопой мяд’ тердарев’ мэёвна ну’’, нидо’ нядаба, илма’’ таӈгамдамба варемдо’ мэ’’ӈа’’. Хардава’’, Ямалва’’, Россиява’’ ӈобкана савадахана’’». Самляӈг тохолкода’’ ӈацекы’’ ӈудахатата паспорт’’ ня’’маць. СВО’ няна мэна нядабади ненадумдась, медальха’’на ми’’ӈась.
Пуна сянако пэйдаць, пэвсюма’ ӈэсонд’ тёрдо’ я’’авлыць. Ӈэрм’ тер’’ «Дружба» нюбе’’ӈаць, пыдо’ Саляӈгардхы «Ямал-ню’’на’’ я!» ассоциациям’ ӈадимдембиць. Сиддо’ ӈуданданадо’ Татьяна Сэротэтто ма’’лавысь. Пирдырмандо’ пуд нерня’ хэвыто’ нюбе’’ намдаваць. Сямянхат ва’’лёйдо’ ти’’: «Русская дружина», «Кочевники», Достык».
Тикы’ хавна харе’’ сыдвыдо’, паӈгалмыдо’ манэ’’лабтамбиць, мядонда ӈавламбиць. Ӈэрм’ тер’’ нина’’ вэя’ леска ябцавыць, халя’ евэйм’ пиревыць, ӈоди тэвравыць. Ӈаврадо’ ёльце ӈавудо’’ӈаць, тольндо’ ний таминда терсялмась. Няби’’ ӈобтикы хуркари ӈавудота лески сертавыць. Пирдыртаха’’ сырманзь товы’’ ёльце саву’’ядонзь.
Тюку илаӈганана’’ невхы иринана’’ теневабцо лэтрамбаба’’на’’ серо’’ӈа’’. Яна’’ ӈэвахана мэна ервава’’ ӈод’’ тикы’ нямна етри’ лаханасеты. Тодо’’ тэнз’’ ненэцие’’ ӈобнзер’’ иле таравам’ вадецеты. Ӈамгэри серона’’ ӈобкана пэркана’’. Ява’’ сянзь илехэва’’. Тарем’ нерня’ мимба’’на’’ нензел’’ ӈэӈгу, мэбе’’мава’’ ӈадяӈгу.
Автор: Анна Яптик’ падвы
Авторы
Няръяна Нгэрм
Темы