Няръяна Ӈэрм
Ӈопой яхана нидо’ манэ’’ӈа’’
Ныланава’ яляха’’на сабе тецьхамя. Тецьда’ халӈэ хая. Пихина машин’’ яляри’’ енты’’. Пин’ тарпорта, пивня ядэрта тянё, маларка’’ мяка’’нато’ ӈамды’’. Индадм’ нэкалпахарта нензел’’ ни ӈа’’. Ся’’, ӈуда’’ ханиворӈа’’. Тарцяхана ӈэрм’ тер’’ ни’’ ханьта’’. Пыдо’ ӈобт’ ма’’люрӈа’’, нито’ лахарю’’ сиддо’ юдаби’’.
Время для чтения ~ 3 минуты
Тодо тэнз’’ ненэцие’’ культура’ мякана ма’’лыва’’. Ӈопой сюдбяко лохо’ мю’ толь ӈабтавы’’. Толь’’ тяхана ӈамдёда’’ ӈули’’ ӈока’’. Марад’ тер’’ мято’ терсавэй’’ товы’’. Ӈамгэ тэнз ӈэвадо’ таминда ӈади, ханяӈы’’ ненэй’’ ембдяродо’ сервы’’.
Вадам’ минрена не лакри’ тикавна ӈадимя, саӈодо’ мал’’ таня’ ха’’мыд’’. Нюрте’’э юнета нява’’ Сергей Харючи лахана: «Ассоциацияна’’ недада ямб. Мале ӈока’’ по’’ ямбан’ сава сер’’ ӈадимдевэва’’ ӈока. Теда’ ӈа’’и пявы сехэрэва’’ илебей’’ ненэця’’ нёдадо’, нерня’ минредо’». Пуданда Эдуард Яунгад «Ямал-ню’’на’’ я!» Ассоциация’ ерв вахалъй’’: «Пона’’ нюртей яляхана ма’’лёвава’’ сава. По’ ямбан’ мэван’ харвана’’ манзаина’’ тасламбива’’, няха’’на’’ ваде’’ӈава’’. Тарця ма’’люрмам’ сяхаӈгав’ ӈармы ненэциена’’ Совет’ тер’’ сертаба пядонзь. Тамальӈгана тэри сяймась, тедахав’’ таранасавэй, хынотасавэй’’ таня’’». Мядоманзь Валерий Елескин товы: «Ӈэрм’ тер’’ ӈарка Ассоциацияна’’ ӈэвахана мэна Григорий Ледков ӈобтикы нянда’’ сейхад минда вади ӈэдарамби. Едэй похона сензада’’ ӈада’’. Илаӈгананда’’ сямян ӈамгэра’’ таняя.» Ӈармы’’ ненэцие’’ Советм’ минрена Борис Шушаков тарем’ лахана: «Сидна’’ нядабадава’’ ӈока ӈэсеты. Ӈобкана тасла я’’амнава’’ яӈгосеты. Нядаӈговандо’ няю’ е’’эмняндо’ ненадо падро хамэдаваць».
Тюку серм’ «Ямал — ню’’на’’ я!» ассоциация’ тер’’ сертабидонзь. Е’’эмняна’’ тарани, сё мэти хамы’’. Ӈацекы хуркари сянакубцха’’на лаво’’ламбидонзь. Ненэй няби луца парнэкохо’ товэхэнзь. Тикэхэвахаюд ёльце мэкадаханзь, сидна’’ хареӈаханзь, письлабтаӈаханзь. Мале сян ӈацекым’, ӈарка ненэцям’ талэӈаханзь. Тикахад «Парнэко» сянакубцхана сянакуць. Луца парнэко нюда лэтрамбись, нябиюм’ хибяхавм’ ня’’амбата тарась. Ня’’амвыда тэри тарем’ нидась ӈэдарамбю’’. Хусувэйдо’ ӈамгэхэв теневабцода манэ’’лабтамбись. Ӈули’’ илекасей!
Ӈопой яхана нина’’ манэ’’ӈава’’, нина’’ мякана мядонда то’’олхава’’. Ненэй сё, хаби’’ няби ӈысми’’ хынабцо намдава’’, луци’’ тарабцо манэ’’ӈава’’. «Старый Новый год» ялям’ тарем’ мэ’’ӈава’’.
Автор: Анна Яптик’ падвы
Авторы
Няръяна Нгэрм
Темы