обновлено: 03:45, 25 августа 2023
Няръяна Ӈэрм
Тамдо’ ханзоць мэ’’ӈадо’
Та’ — ненэцие’’ ныланава’ паӈо. Теда’ ханяӈыдо’ ядембада’’ ё’’ няна ӈайдо’ хаерт’ ядемдамби’’, сыра’ мэ’’манда ӈамгэридамдо’ тэмдаби’’. Ӈани’’ хахаяда’’ хардаха’’на мэсь харвабтадо’. Таняна ныланавадо’ ёльце ханзоць миӈа, пыхыдадо’ мэбемламби’’, ехэрана вадам’ тохоламби’’, хуркари нянандо’ тарана серо минре’’.
Время для чтения ~ 2 минуты
Тандая’ Тюмень’ няна ныланана’’ Ямал’ тер’’ ненэциена’’ сюрберманзь хан’’мыць. Таняна «Стальной характер» сюрамбава ӈэвысь. Ӈокханда ёнар’’ пир’’ пирдырмыць. Тюменьхана илена’’, мат’’ ю’’ мат’’ Россияна’’ марад’ тер’’ пин’ тарпавыдаць. Поӈганандо’ Саляӈгардахад ядэрта Эльвира Окотэтто мэвысь.
— Тюкохона ныланавани сер’ тэри ӈоб’’ нидм’ мы’’. Хусувэй яля’ ӈамгэхэв пэрта манзаякоми таня. Неняӈг’’ иры’ 30 яляхана сюрберӈадамзь. 5 километрм’ пирдаледамзь, ӈани’’ 10, 21 пирт’ сюрамбиць. Ядембись, етри’ ит’ харбилаӈгадамзь. Тарем’ ӈод’’ савась, ӈоб’’ нидамзь пэда’’. Мимани сер’ сомбой яха’ варм’ маниедамзь, табаӈгава’ то’’олха нись ӈа’’. Ӈэ’’ни тэмбой высылӈадм’, ныхыми ӈокамдадм’. Таддикахад тикы яля’ нерцю’’ дартсан’ хан’’ӈадамзь. «Тюменское лето 2023» сянакован’ маркана илена’’, Екатеринбург’ тер’’ ма’’лыць. Мань няхаромдэй ян’ ха’’мываць. Ёльце сава! Тами тароси’’ ни мий’’! — Эльвира тарем’ лаханась.
Сидя яля’ ямбан’ хуркари пирдырми хардандо’ соя’’ма яля’ ед’ сертабавы’’. Тюмень 437 поданда хэвы.
Автор: Анна Яптик’ падвы
