Няръяна Ӈэрм
Падвыни толабида’’
Яр-Саля хардан’ тэворо’’мами ӈока, сянакова’ ялян’ мале юд по’’ турӈадм’. Нюртей сян похона Сёяха’ сёбар’’ ӈацекы’’ поӈгана мэдамзь, тад пуна’ Пэ Саляхад ядэрӈадамзь. Хано санарпаседм’, тадтикахад ямб санам’ мэцетыдм’, нерня’ ха’’мормами сяхаӈгарт яӈгу, тэри тарця сёбар’’ ненэцяндм’. Тюку по’ ӈани’ санарӈадамзь, ӈоб’ тарем’ пуняна мэдамзь. Ханзер’’ и’’ ӈэбта саць нидм’ таӈыламдёмбасету’’, савовна таро’’мы няха’’ни маймбасетыдм’.
Время для чтения ~ 2 минуты
Пудана похо’’на ненэця’’ си’’ми манэ’’пато’ манзеты’’: «Макар Ӈокдэта, паднана пыдар?» Манзетыдм: «Тикы мань!» Интернетхана падвыни’’ толабада’’ си’’ми тенева’’.
Хэвы яляха’’на, Яр-Саляхана толаӈгова’ мякана ханяд товами, ӈамгэ’ нямна паднавани няю’ вадам’ мэ’’ӈадамзь. Ма’’лёвы ненэцяӈг’’ ханяна соя’’мами ваде’’ӈадамзь, ханзер’’ вадёдавами, паднава серо лахарёхона мал’ таслэйнаць. Толаӈгода ненэця’’ тодо хардаха’’на иле’’, хусувэдо’ тось я’’мадась, тикы’ е’’эмня ӈоб’’, сидя вадам’ хар’’ни хэтаӈгудм’.
— Мань нюмами — Макар Окотэтто, Яптик-Саля’ выӈгана вадыдамзь, тад пуна’ Новый-Портхана нерденя классани’’ ма’’ледамзь, ӈарка классани’’ Пэ’ Саляхана мэйнась. Тохолко ӈэвада’’махадани хой’ няна хаидамзь, ты’ манзаям’ пэрӈадамзь, халям’ хадабидамзь. Тет, няхар’’ по’’ тяхана ВКонтакте иӈудота вади падыба пядамзь, ӈари’’ пукуна иле’’мя’’ ӈадимяць. Тикы’ хавна небой поход ненэця’ вадавна ӈэда газетахана, Нярьяна Ӈэрмхана паднадм’, таняна падвыни’’ ӈани’ толабида’’.
Макар Окотэтто’ падвы
Авторы
Няръяна Нгэрм
Темы