обновлено: 05:07, 18 января 2024
Няръяна Ӈэрм
Панорць ва’’лёй’’
Сяхаринда ӈэрм’ тер’’ понд выставкаха’’, тамна ӈани’ ӈамгэхэ’’ тэворпани ӈодякоход паӈгалмы мэта саць ӈока ӈэсеты’’. Тэри маниебцё’’. Тэмдабаб’’, саць мирецеты’’. Ненэсяри ӈодяко’’ ӈа’’и похот ӈадимы’’ ӈэвы’’. Тикы’ нямна паднана нява’’ Лариса Окотэтто тарем’ тензебтембидась:
Время для чтения ~ 2 минуты
— Я’ сяр’’ ниня мале сян ёнар’’ по’ ӈодяко манзаяйдо’. Египет’ няна тет ёнар’’ по’ тяхана ӈадимы’’. Тамальӈгана пэм’ табхад сертаба пявы’’. Жемчугм’ хусувэй не хось нивы пирас’’, ӈадьбята пэхэд жемчуг’ то’’олаха мандалюй ӈавэ манпавы’’, тикыдо’ араб’’ бусер’’, бусраӈэ нюмдебавыдо’. Россия яна’’ мел’’ не’’ 10 юр’’ по’ панора’’.
Тет ю’’ по’ техэ ӈодяко’’ ӈули’’ сомбой’’. Стеклярус’’ ӈани’ таня’’. Луца ӈобтарем’ панора, ӈодякохо’’на имбытадодо’ падтамби’’, ик’ тяхамна мэта ӈавэ сертаби’’, нюбедо’ — гайтаны. Хабей’’ панорабцо’ ӈобтарем’ яӈга. Нето’ масер’’ нюбедо’ турлопас — ик’ ӈэсоӈгад ни’ сярма’ ӈэсонд’ тэворӈа’’.
Сахлопас — лэмбара масер’’, сакпаль — хавопя’’, тикы’ хавна тюто’ вар падтамби’’. Хусувэй’’ ненэця’ тэнз харто’ харвабтана ӈодякуто’ тэнз’’ таня’’. Ненэй не’’ пэсьдана, ӈаха’’ ӈадьда’’, таминда сэван’ ха’’морта ӈодяко харвабта’’ — тарця ӈамгэм’ ненэць манэ’’пата, таминда маймбаӈгу. Есь’’ ӈэся’’, ӈолепи’’ падкоця’’, туцякоця’’, буркы’’ мадавы’’ — мал’ паӈгалць пирры’’. Ӈодь пон ӈамдё вырар таняя.
Тюку сидяӈгахана тодо ӈэрм’ яхана’’ илени паӈгалмы манэ’’яда’’. Ненадовна ӈули’’ паской’’.
Автор: М.Ярой’ падвы
