обновлено: 04:36, 10 октября 2023
Няръяна Ӈэрм
Недармава’’ теневаӈгудо’
Вэба’ иры’ 29 яля’ «Няръяна Ӈэрм» газета’ редакциявана мядонда’’ ӈадимяць. Колледжхана тохолкода’’ ӈацекы’’ ӈэвы’’. Сиддо’ тохоламбадандо’ ня’, Нина Михайловна Егерь’ ня’ товы’’.
Время для чтения ~ 3 минуты
Мяк’’ турта’’ нина’’ хубтахана мер’ тоць. Юкад вата самляӈг’ пир’’ ненэцясь, тарем’ ӈод’’ редакция’ лохо’ мю’ мал’’ нялӈава’’. Нерня’ Галина Сергеевна Кинчина (Окотэтто) вадамда хана. Пыда ненадовна газетам’ падыбади’’, юне тэволани’’ манзая’ нямна лаханась. Ӈацекы’’ няданда ӈока ӈамгэм’ намдаць: хибя’’ «Няръяна Ӈэрм»‘ ӈэвахана мэвы’’, хибя’’ теда’ паднанаӈэ тара’’, газета’ мюй ханзер’’ ма’’ламбада няби ӈамгэхэна пандамбада. Теда’ тохолкода’’ тенева’’: газетава’’ я’ сяр’ ниня яланда ӈопой, ӈани’ ханяхартана ненэй вадавна паднана яӈгу.
Саляӈгардахана пудана по тохолкода Виктория Окотэтто тарем’ мась: «Мань тюкон’ мядоманзь турмами яӈгусь. Нянда’’ тэвавами ихинани ёльце сава. Нюртей газета’ сяха’ ӈадимам’ намдадм’. Ӈавхы похот паднанаӈэ хуркари’’ юнета’’ ненэця’’ таравы’’. Хусувэдо’ ӈамгэхэв савам’ пуданда хаевы. Газетам’ манэсармани сер’ теневана нини манэ’’ӈадм’. Ненэця’ вадавна паднаван’ харвабцоми ӈани’ танясеты. Си’’ми тохоламбадахани лаханасетыдм’, паднана ненэця’ ханяна тарабта. Пыда манзеты, «Няръяна Ӈэрм» газета’ редакторан’ хэсь пир’’ӈар. Тохолковами ёльцевани пуд ненэй вадам’ минренаӈэ тохолко тасламбив, тикахана хар’’н вадами ӈоб’’ мэтав».
Турмы’’ — нюдяко’’ ӈацекэхэ’’на, садикхана манзараванда’’. Пыдо’ индо’ ядэрабцо няна’’ хэтаць: «Манзаяра’’ нерняри’ миӈая. Ӈацекы’’ е’’эмня ӈадимдембада «Мынико» газета округна’’ тиӈгэвна ӈэда садик’’мана ӈэдарамба тарава’ сер’ ӈа. Таддикахад «Няръяна Ӈэрман’» хуркари’’ сянакубц’’, хобцоку’’, тамна ӈани’’ мэкад ӈамгэку нядабида’’».
Нина Михайловна ӈобтарем’ лаханась: «Ненэся илаӈганана’’ газета’’ тарабцодо’ ӈарка, ӈэрм’ тер’’ ненэцие’’ вади, ила’ саиро лэтрамби’’. Галина Сергеевнан’ няби «Лух Авт» паднанан’, Лонгортова Вера Алексеевнан’ инзелевари то’’олхась, вадетиди’ яхандо’ тид’’ ха’’морӈаць».
Сидяӈг сертаваць, хибяхав мамононда: «Мале ӈока’’ по’’ ханда’’, тадта’’мина’’ манэтава’’, мандава’’, тарси’’ мэкадакова’’ ӈэвэва’’».
Автор: Анна Яптик’ падвы
