Пэ’’ тер’’ хэбидя ялямдо’ мэ’’мы’’

Россия’ яна’’ ӈардавна ӈарка’’ марад’’ тер’’, нюдяко хардакохо’’на илена’’ си’’ив яля’ ямбан’ ненадо ялям’ мэ’’ӈаць. Пудана по’’ ямбан’ ненэця’’ пэдараха’’на, выӈгана хэбидя ялямдо’ мэ’’манзь ӈани’ ӈобт’ тэворӈа’’. Тарем’ Приуральской район’ няна ты пэртя’’ ӈопой ӈэсын’ ма’’лёвыд’’.

Время для чтения ~ 3 минуты

Пилю’’ иры’ 9 яля’ ненадовна е’’эмняндо’ хэбидя яляӈэ таславы. Пыдридо’ харто’ явнандо’ мюсерӈа’’, невхы похот мэта иландо’ паӈгм’ мэйрамби’’.

Мядото’ сидя хэвхана Пэ’’ хой’’ ӈади’’. Сидяӈг: М.Яр’ тадтавы

Хардахана илена’’ ӈэрм’ тер’’ нидо’ манэ’’манзь ӈэдалёрмы’’. Аксаркахана лекар’’ неӈэ манзарана Лидия Ярой Вэненго еркарм’ мэта ненэцие’’ мякана мядомы.

— Нини’’ — Тасу’ я’ тер’’. Пэ’’ хой’’ няӈы вы’, лапта Ӈэдя’ выӈгад ӈули’’ яӈга. Пирцяка’’я’’ пэ’’ ӈэсым’ сюрте’’э ну’’. Ханяӈы’’ яха’’на сырада та’ ямбан’ ни холкаӈг’’. Неняӈгахартадо’ тянё то’’олха. Ӈэсыдо’ Хадыта Яха’ хэвхана ӈа. Ненэця’’ таӈга иле’’. Невхы недармидо’ нёда’’: тыдо’ лэтамби’’, нюкцидо’ вадаби’’. Хусувэй яля’ харто’ вадандо’ нямна яӈга ни’’ тасалкур’’: вадава’’ таняӈгу, яӈгода… Тэри иле’’, янамбовна иламдо’ нерняри’ тидхалембидо’, ханяхартад табекодамдо’ ни’’ ӈате’’. Танярина иринана’’ мэ’’мы вада етри’ со, илна’’ саир’’ нерня’ миӈа. Ӈобт’ ма’’лёвы’’ ты пэртя’’ помнандо’ пирдырӈаць, сямянхат мерець ӈэдалёртамдо’ тэрабиць, сёбар’’ сянакубцха’’на мэбетамдо’ таслаць. Тикы’ хавна тамна едэй луца’’ сянаком’ — «волейболм’» мэ’’ӈаць. Илебей не’’, хасава’’ варемдо’ мэць сянакурӈаць. Пэ’’ хоё’’ помна тёрридо’ хан’’ӈаць.

Нямдота ниня ӈарка вы’ ява’’ ня’’амбада то’’олха. Сидяӈг: М.Яр’ тадтавы

Приуральской районхана ты пэрти серо ня’’амбада АПК’ ӈэвахы Юрий Лаптандер ӈани’ таня’ тэвормы. Вы’ тер’’ няданда тарана юн намдавы’’. Вадавнанда, ӈани похона ты’’ лекарахат аптечка мипаӈгу’’, мирци’’ ненэцие’’ помна тярпаӈгудо’. Мюнянда сата’’ пардон’’ яӈгода’’, тэри яӈгана мэта ӈавори’’, мэдна ты савумдамбава’ пир’’ пардон’’ таняӈгу’’.

Пэ’ тер’’ тарем’ сянаковандо’ сер’ мякы манзаяхатато’ нылана’’. Сидяӈг: М.Яр’ тадтавы

Тадри’ тохолкованзь хэванда’’ ӈацекы’’ нямна тасалковы’’. Ӈэсы’ тер Степан Тайбери тарем’ лахана: «Хусувэй по’ школан’ ӈацекым’ ӈэдабтамбава тоенасеты. Ханяӈэхэна хар’’ни тэхэ’’на, квадроциклха’’на хардан’ ха’’аврасетын». Теда’ нум’ вэва ӈэб’’, тиртя ӈано пон яӈгоб’’, выӈгад АПК’ серо минренаха’’ лаханаӈгу’’, пыдо’ тарця вадам’ намда’’махадандо’ хардахад ӈацекы хосаяванзь вездеходм’ ӈэдабтамбаӈгу’’. Тарця юнм’ ненэця’’ саву’’мэдо’.

Автор: Галина Кинчина’ падвы

Авторы

Няръяна Нгэрм

09:15, 24 августа 2023

обновлено: 03:51, 25 августа 2023

Темы