Няръяна Ӈэрм
Пилю хадабада’’
Небяхаюни’-нисяхаюни’ илева’ ямбан’ вымна мюсерӈаха’. Хусувэй ненэй манзая’ тэнзм’ сэвти’ хая’’ серта пиртади’. Мяканана’’ ӈацекэӈэ сидндетваць. Ӈарка нина’’ хусувэй тарана серт’ сидна’’ тасувна табедамбасеты’’, тохоламбасеты’’. Ненэйхававна хадаева’’ сидна’’ пилю хадабава манзаян’ сававна тидхалесь.
Время для чтения ~ 2 минуты
Епдя’ ёльцяӈгана выӈгы ил’ тоена. Паддена тэкоцяи’’ неняӈгахат, пилёхот хунорць мякандо’ ӈапамба тосеты’’. Нина’’ мандним’’: «Ӈацекыей’’, пилюдава’’ ня’’маркава’’!»
Хадаева’’ тарем’ манзеты: «Ӈавкыда пилёхот лэтрамба варера’’ мэ’’ӈада’’. Тына’’ сямянхат таранина’’. Тэсипой ялява’’ яӈгу!»
Ти, та’ ямбан’ пилю хадаба варева’’ мэцетыва’’. Хусувэна’’ тикы пинкабтада ӈамгэрихит хобада панцеты. Пилём’ пяхана токадтаӈгур, ӈэвамда ныкалтан, хобанд ни’ мэӈгур. Пуна тикыд я’ ӈыл’ такалтыд, тарця вади мэтан: «Я’ небянд мат’ хонад’’!»
Танда ваерава’ сер’ пилё’’ нид тянюмзеты’’. Тына’’ таӈгамда’’ то’’олаха’’ ӈэсеты’’. Хадаева’’, небяхаюна’’ — нисяхаюна’’ сидна’’ ёльце савуцеты’’: «Пыдара’’ пэдава ӈэванда нид тына’’ пилёхот сейдо’ ни’’ пин’’»/
Автор: Светлана Тусида’ падвы
Авторы
Няръяна Нгэрм
Темы