обновлено: 03:44, 25 августа 2023
Няръяна Ӈэрм
Пилю’’ иры то
Няхар’’ ю’’ яля’’ тадхав’ ӈани’ хая’’. Хурка манзаи сертада’’ ? Ханямна ӈэдалёрцада’’ , хибям’ манэцада’’ ? Ялэна’’ «ӈын’ муӈгадарев’» ёльце мер’ хан’’ ӈа’’. Тандая’ нюртей неняӈг’ мунм’ намдаваци’’. Мале пилю’’ иры пэвы’’.
Время для чтения ~ 2 минуты
Тюку ирыхына маня’’ выӈгана ӈани’ тэтнасетыва’’ , тына’’ паддесеты’’. Сяно’, луца хабте’’ э’, хоба’ пилю’’ лэёмбададарев’ тирцеты’’. Мякана ныланана’’ паромба сэр’’ хоб лехэбтасеты’’. Лакри’ подер’’ пеля, няда’ яӈгацеи, лабцёй пилё хадаба мэта пякоци ня’’ амсеты’’.
Тадхав’ мерця’ няюна ты’’ тяхана мунодо’ я’’ авлаӈгу’’. Ӈобо’’ манзеты’’ : «Хасена’’ , ну’’ , нинанд ӈамдёда таня!», «Вэй, ӈани’ ӈэдарабтав!», «Няданд ӈокам’ хададм’!», «Тиртаханда маядав». Тыдо’ тарабтамбадахандо’ яляндо’ ваеравам’ тамна нидо’ хамэдаӈгу’’ , ты’’ хадырма’ ёльцяӈэ хэвы ӈэӈгу. Пуна тыто’ хэ’’ мяхад панта’’ ӈэсякудо’ манэта’’ , хибядо’ сяӈокм’ еремдевы ӈэбта.
Тедахав’ хуркари’’ тым’ таӈгамламбада ӈамгэ’’ ӈадимя’’ , таддикахад хусувэй по’ ӈэсы’’ мана ты’’ лекар’’ ӈэдалёрӈа’’.
Пилю’’ ирым’ сававна мэкава’’. Мюсерта’’ нина’’ сенз’’ ӈэя’’ , тыдо’ сибяхат, сянохот ехэрая’’. Ядембада’’ яха’’ на ныланана’’ ӈока ехэрана ям’ манэ’’ ӈая’’. Манзарана’’ хибяри’’ пэдаран’, вынд’ ӈодядамдо’, тудакодамдо’ ма’’ лаванзь хан’’ ӈая’’.
Анна Яптик’ падвы
