Няръяна Ӈэрм
Пя хобцоку’’
Хой’ няна тэри мэвана’’ сер’ хобцоко пюрцетыва’’. Хибя хурка хобцоком’ тенева тарцям’ вадецеты. Мяк’’ тона таняб’’, нямд тикаханда вунир ӈэдараӈгу’’, нянда манд’’нинав’’: «Ӈамгэхэв теневана хобцокор таня? Няна’’ вадетава». Пуна намдавыд тамна’ тяха’ вадетыд. Ти, тарем’ невхы’’ лаханако’’, я’ вал’’ няна’’ тэвавыд’’.
Время для чтения ~ 3 минуты
Тэри вадета хобцоко’’ хавна пяхат, лэхэт, нямдахат мивы’’ таня’’. Ӈацекы’’, ӈарка ненэця’’ мал’’ ӈобкана сертаба пиръядо’.
Нямэхэна Тасу’ я’ тер Валерия Гутман (Тибичи) илека «Хобцокодва’’ хохова’’» проектм’ падвысь. Нянанда лаханакурӈадамзь. Пыда тарем’ ваде’’ӈадась:
Мань Ӈоя’ выӈгана соядамзь. Пэвсюма’ няна манзаина’’ мале’’махадана’’ мяна’’ тер’’ ня’ сянакосетыва’’, хобцоко пюрцетыва’’. Хобцокуна’’ нисява’’ е’’эмняна’’ пяхад мимбасетыда. Тамальӈгы пони сававна тенеян. Ӈацекэхэюни’ иринди’ хобцоко ӈани’ теневабти’ сава. Ӈадьбята ӈарка проектм’ пада идейваць.
Валерия теда’ Халмер-Седе’’э хардахана ӈэда музейхана манзара. Хусувэхэт музей’ мюй’’ ӈамгэри’’ нямна лахана пэрӈа. Тикахад ненэцие’’ е’’эмня тохолкова сертаби.
Тюкуми мале нябимдей проектами. Няхар’’ по’ тяхана «Музейная игротека» сянакубц ӈадимдедамзь. Теда’ грантани есяха’’на 120 пя хобцоком’, сидя тольм’, тет халбуй ӈамдёрцям’ тэмдадамзь. Тет ю’’ пя хобцокоми ненэй ненэцие’’ хобцо’’. Мал’’ ӈудахана мивы’’. Тарця’’ таня’’: «Няхар’’ юсна», «Пыӈга’’», «Танць’», «Тет лохо’’», «Иням’ тярпава», «Няхар’’ пясик», «Пынделабтавы мя’’», «Сюртяв юснам’ нялкэбава», тамна ӈани’’. Ӈарка ненэцяӈга’’на, ӈацекэхэ’’на сава’’.
Ӈарка пэвдей ирыхына манзаянда ӈарка пелям’ малевэда. 2024 похона хамэдёда’’ сянакуда ханяримна ядэлаӈгуда, ненэцяӈг’’ вадетыда. Хусувэй хибя мэць пиртыда.
Проектами ООО «Меретояханефтегаз» няд’’мяць минрев. Гражданской форум’ мальӈгана манэ’’лабтамбинанзь. Пуна музеян’ ӈармы ненэцие ма’’ламбиваць. «Нам года не беда — коль душа молода» яляхана ӈобтикы сертабинаць. Ӈарка пэвдей ирыхына варючи’’ ненэцие’’ ед’ «Мир в котором мы живём» фестиваль миӈась. Мань ӈани’ тикахана мэдамзь.
Тарем’ Валерия невхы сянаку лэтрамби. Таддикахад иланда саирм’, вадамда нерня’ минре.
Автор: Анна Яптик’ падвы
Авторы
Няръяна Нгэрм
Темы