обновлено: 09:54, 31 августа 2023
Няръяна Ӈэрм
Пяйвадо’ яӈгу
Пилю’’ иры’ 26-27 яляха’’на Харпахана «Северный характер.Трейл» ӈарка сюрберма ӈась. Сёбар’’ ненэця’’ маркат, нюдяко’’ хардахат нидо’ нертембуванзь тоць. Яна’’ ханярид мэбете’’э’’, мерета’’, ӈамгэхэртм’ ниня пилюта’’ ма’’лыць.
Время для чтения ~ 3 минуты
Ямальской район’ тер’’ поӈгана «Профи» сюрбермахана самляӈгдонзь: Иван Худи, Людмила Лаптандер — Яр-Саля’ терха’, Владимир Тусида, Руслан Яптик — Сёяхахад товэхэ’, Анна Яптик Панаевск’ е’’эмня сянаковы. Ханяӈыдо’ тарця пирдырмахана сяхаӈгарт’ мэ’’мадо’ яӈговы, ӈокаюм’ пелядо’ нито’ хурка ӈэвахад ехэравы’’, ӈадьбята нюрте’’э’ хаця’’ тосаркавы’’, пинаркавы’’. Сидя няхаюдо’ яландо’ сюрберта’’ «Любители» понд’ пыхыдади’ падвыди’: Лилия Сэротэтто, Прокопий Окотэтто.
«Профи» поӈгана ӈокханда 9 командась, 12 километрм’ пирдалембиць. «Любители» поӈгана — 17, мат’’ километрм’ мэбто’ тарась. Ямальской район’ тер’’ пударка сидндетимдейӈэ сюрмбавыд’’. Хуркари’’ вэвако’’ я’’ таняць: пэ’’, сабол’’, яха’’. Самляӈг ненэця’’ мал’’ ӈоб’’ мальӈгана тобто’ серо’’ӈась. Ӈадьбята нидо’ ёльце нядабидонзь. Пиня’ миндарихиндо’ ӈока ненэцям’ хаевы’’. Пуняхаюв’’ ёльце мерець ӈоб’’ ирсу’’ ми’’мы’’. Тарем’ ӈобанзер’’ сюрамбава сиддо’ ӈули’’ сахамламбавы, хибяхартадо’ нись хаюр’’.
Ӈопой час’, няхар’’ минута сюрамбиць, таддикахад нюртейӈэ тэвыдаць. Пудандо’ Си’’ив харв’, Саляӈгарад’, Нядаӈгарад’, Мужи’, Аксарка’, Губкинский’, Красноселькупской район’, Ноябрьск’ тер’’ тоць. Нидо’ нядабиць, ӈадьбята сямянхат мере’’ӈаць.
Хуняӈы яляхана ӈани’ пэйдаць. Хусувэдо’ харта сюрамбись. Мал’’ 12 километр’ пирт’ сюрамбавы’’. Хасавахат нюртейӈэ Владимир тось. Руслан тетимдеясь. Иван матдомдей ян’ ха’’мыць. Аннаха’ Людмилаха’ 9 няби 10 тэвавэхэ’. Иван няби яӈорэй’’ 6 км хаясь, нида мал’’ нертейдась. Пуданда Приуральской район’ тер Матвей Лаптандер тось.
Панаевск’ тер Алексей Окотэтто 50 по’’ пиркана мэни’’ поӈгана 3 ям’ ханась. Тикы’ хавна скандинавской ядвахана нябимдеясь. Сюрбертава’’ ӈули’’ ӈокась. Хибя тикахана мэвам’ манэ’’ман харваб’’нанда’’ http’://северныйхарактер.рф/ сайтан’ тюӈгада’’.
Сюрберӈада’’, нерняри’ ӈада’’!
Анна Яптик’ падвы
