обновлено: 03:51, 27 июля 2023
Няръяна Ӈэрм
Поӈгадо’ панӈа’’
Неняӈг’’ ирыхына округна’’ тиӈгывна халядани’’ хэбидя ялям’ мэ’’ӈаваць. Хусувэй хардахана ёртя’’ ненэцие’’ ед’ мэкад ӈавэ сертавыць. Маня’’ Приуральской районхы Аксаркан’ тэворӈаваць.
Время для чтения ~ 2 минуты
Хардадо’ саля яв’ лаӈг’ ниня ну. Таняна ӈока хибя’’ илева’ халям’ пэрӈа’’. Тикы’’ нито’ е’’эмня сава сянакова’ ялям’ сертавыць. Нюрте’’э таб лаӈг’ ниня нидо’ ядабтэйдонзь. Таняна мотор’ ӈанохона лабята пирдырӈаць. Таб’ ниня мядо’ тер’’мана тодабцяӈгана халя’ евэй пирембиць. Идюрця’’, палкур’’, пыри’’ хусувэдо’ харто’ халядамдо’ тэвравыць. Сямянхат нюртейӈэ Перчеда еркарм’ мэта мяд’ тер’’ евэйм’ пиревыць. Пыдо’ халя’ евэйн’ тамна борщм’ мэвыць.
Ирина Тайбери Лаборой’ няд товы няна’’ толь’ ядхана пиревыда хорпавы саць ӈокась. Танянанда тэхэ’’на мэвы, та’ нядэ хаёвы. Сянакова’ яляхана мэванда няю’ хаёвы. Харта ӈод’’ пиревы халянда евэй ӈули’’ ӈавыдо’’ӈась. Ирина Ильинична ма’’нисяв, халядами мякадани тэврадамзь. Евэйми пайхахана пиревась. Яханана’’ тарцяри ӈаворӈава’’. Тарця халя’ тэнз ӈамзада хасуй. Тикы’ хавна яханана’’ вадёданана лукм’ тэврадамзь. Сяхаринда евэйм’ пирембавани ёльцяӈгана сяхаӈгарт’ юртя нив ха’’аврамбасету’’, тарем’ ёльце ӈавыдо’’ӈа.
Пуна Ирина Ильичнина райондо’ ерв’ ӈудахад халя’ евэйнда ӈавыдо’’ма’ няю’ ю’’ ёнар’’ есям’ ня’’мась. Мале площадь’ ниня ненэй ӈарка пирдыро’’мидо’ мэ’’ӈаць. Сёбар’’ ныхыдырӈаць. Не’’ паской паныдо’ манэ’’лабтамбиць. Ӈанидо’ халэ ясьпиць, не’’ тандая’ ватавы ӈаябадм’ мюлебиць. Ёртидо’, ӈокавна халэ хадабавыдо’ ненадумдэйдонзь.Тарем’ Хо’ саля’ няна ёртито’ хэбидя ялям’ ядабтадонзь.
Марина Яр’ падвы
