обновлено: 04:26, 09 августа 2023
Няръяна Ӈэрм
Пэ’’ тер’’ пуня’ пяӈгудо’
«Пэ хада» ядхана мат’’ ӈарка мя’’ небой’ пондо’ тотрев’ то’ ядхана мярвы’’. Пыдо’ тасла таня’ ямдавы’’. Пилю’’ иры нябимдей яляхана Пэ’ тэлхана мюсерта’’ ненэця’’ етри’ ӈобт’ ма’’люрӈа’’. Теда’ ӈод’’ таславы яляхана «Байдарацкий» совхоз сиднтетимдей ӈэсы’ няю’ нэкалӈадонзь. Таняна пыдо’ хэбидя ялямдо’ мэ’’манзь турӈаць. Хусувэй по’ тикы яля мюсерта’’ «Та’ ер’’ ялям’» ядабтамби’’.
Время для чтения ~ 4 минуты
Ӈэсындо’ ерв Леонид Тайшин’ вадавна пыдо’ мале ӈахакуд хамекурць пэвыд’’. Леонид Дмитриевич ма’’нисяв: «Тюкон’ тэввана’’ нерня’ тасалкурцетыва’’. Хибя’’ ӈамгэ’ то’’олха ӈавэ сертабаӈгу’’. Нянана’’ хусувэй хибяри’’, ӈэсыхына’’ тона’’ — тарана мядондава’’, ӈадьбята нина’’ ядабтавана’’ нерня’ ёльце варева’’ мэ’’ӈава’’».
Тюку по’ ненэсяри юрмян ӈэдалёда’’ тодо пэ’’ тэлхат ӈэдалё товыць. Пыдо’ пирдырмито’ хавна сава ням’ ядабтава ӈани’ тарана серӈэ толы. Теда’ хэбидя ялямдо’ Гавриил Лаптандер ма’’лавы сидяӈг’’ выставкахад пядонзь. Пыда сяни ю’’ по’’ тадтамбавы сидяӈгада’’ манэ’’лабтамбись. Ӈоб’’ сырмы Ульяна Лаптандер ӈэвысь, пыда ма’’нисяв: «Сидяӈго’’ поӈгана харе’’ нюни’’ манэ’’ӈадамзь. Пыдо’ мале ӈахана ӈарка ненэцяӈэ хаяць. Ихиня, тюку выставкадо’ ёльце мэкад ӈэвы. Тарем’ маня’’ невхы иле’’мина’’ тензебтембива’’».
Сёбар’’ хасава мале хэвнякуна тынзяӈудо’ ня’’мармыць. Пыдо’ нянандо’ ярколава, ныхыдырма, санарма ӈули’’ тарана сянакубц’’. Ханяӈыдо’ сяни пирдырмахана мэць. Поӈганандо’ хуркари юнета сёбар’’ ненэциедо’ таня’’. Василий няби Петр Лаптандерха’ пирдырпати’ ва’’лёйха’. Ӈобкана мале сян пирдыр’’махана мэ’’ӈаханзь. Ӈока мэвахана нерня’ ха’’мыхынзь.
Пирдырти’’ хавна тэри сырта’’ ӈани’ таняць. Нити’’ хэвнякуна сидя ӈамдёдам’ манэ’’ӈадамзь. Тикахаюни’ пебяс Ӈокдэтаха’ ӈэвэхэнзь. Пыди’ ниди’ мале пон’ нивыди’ ядабтамбю’’. Ӈадьбяти’ теда’ Хада пэ’ няю’ сядоць Иван няби Вячеслав ӈамдыхынзь. Хэвувнани’ ядэрти ӈоб’’ нидинзь мание’’. Ӈавнанда ӈод’’ ӈобтикы’ юнета сёбар’’ ненэцяӈгаць.
Тарця пирдырмаха’’на ненэця’’ ненэйвана ты’ ӈэхэна ӈэдалёрти ӈатесеты’’. Теда’ ӈод’’ нумда ханзуво’’махад мато’’ман’ харвана’’ тюрдо’ нэкалӈаць. Ӈэдалавандо’ нерня’ ханхато’ хацяць выдаӈг’’, ӈадьбята ханодо’ пуняд тамна няхар’’ сян ненэця’’ ня’’амбасетыдо’. Нюрте’’э ма’’нисям’’: «Не’’ ни’’ ӈэдалёрт’’». Хадюларавандо’ нямна тоса тарем’ сертаван’ харвадонзь. Хубта ян’ ӈэдалё’’махадандо’ пыдо’ тарем’ ниць харва’’. Тасалкоро”мито’ пуд пирдырманзь ӈэдарэйдонзь. Тэри ӈопой няю’ ӈэдалёрӈаць. Ты’ ӈэхэна пирдырти’’ ӈадиво’’махад тёр’’ я’’авлахамаць. Тамна пэ’’ хой’’ ябтиӈэ сертабада’’ то’’олхаць.
Таӈок матоти’’ поӈгана Нямбо Лаптандер’ ты’’ саць мере’’мы’’. Не’’ поӈгат пухуцяда Оксана ӈани нерденаӈэ ӈадимясь. Пыди’ мяканди’ сидя посё ӈаном’ хана’’ӈаханзь. Сидибты ӈэдалёбти’ меремэхэ’. Нямбо тарем’ пирдырманзь тыда 30 ӈэдалава’ тяха’ тэвравыдась. Ӈануди’ пэ’ тэл’’ ӈыхы еси вэрамба ӈарка няд’’ма ӈэӈгу.
Тарем’ пэ’’ тэлхана «Та’ ер’’ ялям’» мюсерта’’ ненэця’’ мэ’’ӈадонзь.
Автор: М.Яр’ падвы
