Няръяна Ӈэрм
Пуня’ пяӈгудо’
Приуральской районхы «Пэ хада»м’ нюбета хэбидя я’ ядхана мат’’ ӈарка мя’’ небой’ пондо’ тотрев’ то’ ядхана мярвыць. Теда’ ӈод’’ таславы яляхана «Байдарацкий» совхоз сидндетимдей ӈэсы’ няю’ ненэця’’ ӈэдалё нэкалӈадонзь. Танямна хусувэй по’ мюсерта’’ «Та’ ер’’ ялям’» ядабтамбиць.
Время для чтения ~ 3 минуты
Тюку по’ хэбидя ялядо’ ӈамгэ’ пирувна яӈгамдавэдонзь. Тикы’ нямна районханандо’ ӈэрм’ тер’’ серо тидхалембада отделандо’ ӈэвахана мэна Юрий Вячеславович Лаптандер лаханась. Ма’’нисяв, тюку по’ таняна помнана’’ тасалковам’ мэ’’ӈаваць. Районана’’ ӈэвахана мэна Иван Сакал тэворӈась. Лахарёва’’ ӈэрм’ тер’’ е’’эмня тидхалембада «Дорожная карта»‘ нямна ӈась. Теда’ ервона’’ мюсерта ненэцие лаханакурць няць вымна ӈэдалёрӈа’’. Тэхэ’’на мэнаха’’на ӈамгэ таравам’ намдарамбиваць. Мюсерта’’ ӈока вадам’ тыто’ ӈамза’ мир’’ нямна хэтаць. Няби категорийвана ня’’марпада ӈамзандо’ мир’’ саць тянё ӈэвам’ ваде’’ӈаць. Юр’’ самляӈг юкад сидя юркад ватаӈэ сертавам’ хэтаць, тарця ӈэбта сидя’ пирувна ӈокамдаӈгудо’. Тикы’ хавна ханярид телефонувна лахана пир’’мамдо’ тензибтець. Нядандо’ намдвына’’ мал’ падынаць.
Сяни’’ по’’ «Байдарацкий» совхоз сидндетимдей ӈэсым’ Леонид Тайшин’ ня’’амбида. Сававна минрена манзаянда юн ханярина со. Пыда сянакова’ яля’ нямна тарем’ мась:
— Мале сян по’’ Та’ ер’’ ялям’ ӈэсыхынана’’ мэ’’ӈадо’. Маня’’ ӈахакуд хамекурӈава’’, теневава’’: таславы нумгана ӈэсыхына’’ ханярид ӈэдалёда’’ ӈадимда’’. Тюкон’ тэввана’’ нерцю’’ тасалкурцетыва’’, хибя’’ ӈамгэ’ то’’олха ӈавэ сертабаӈгу’’ мал’ тенева’’. Нянана’’ хусувэй хибяри’’, ӈэсыхына’’ тона’’ — тарана’’ мядонда’’, ӈадьбята нина’’ ядабтавана’’ нерня ёльце варева’’ мэ’’ӈава’’. Мюсерта’’ нина’’ ӈобтикы тарця юнхат тенева’’, тад ӈод’’ таӈок по’’ сер’ харто’ тоховы’’ ӈэӈгу’’, пилю’’ иры’ нябимдейхана сидндетимдей ӈэсын’ ӈэдала тараӈгу.
Тюку по’ юр’ мян’ ӈэдалёда’’ пэ’’ тэлхат товыць. Пирдырмито’ хавна я’ тяхамбавы ням’ ядабтава ӈани’ сава. Сёбар’’ хасава ярколавы’’, ныхыдырмы’’, санармы’’. Мэкад сянакубцха’’на сянакуць. Ханяӈыдо’ сяни’’ пирдырмаха’’на мэць. Поӈганандо’ хуркари’’ юнета’’ сёбардо’ таня’’. Василий няби Петр Лаптандерха’ пирдырпати’ ва’’лёйха’. Ӈобкана мале сян пирдырмахана мэӈаханзь. Ӈока мэвахана нерня’ ха’’мыхынзь.
Пирдырти’’ хавна тэри сырта’’ ӈани’ таняць. Ненэця’’ ненэйвана ты’ ӈэхэна ӈэдалёрти ӈатесеты’’. Теда’ ӈод’’ нумда ханзуво’’махад мато’’ман’ харвана’’ тюрдо’ нэкалӈаць. Ӈэдалавандо’ нерня ханхато’ хацяць выдаӈг’’, ӈадьбята ханодо’ пуняд тамна няхар’’ сян ненэця’’ ня’’амбидонзь. Ты’ ӈэхэна пирдырти’’ ӈадиво’’махад тёр’’ я’’авлахамаць. Тикахат пэ’’ хой’’ тамна ябтиӈэ ханта то’’олхаць.
Тарем’ пэ’’ тэлхана «Та’ ер’’ ялям’» мюсерта’’ ненэця’’ мэ’’ӈадонзь. Тикындо’ пуд пырдари’’ мюселтыд’’.
Автор: М.Яр’ падвы
Авторы
Няръяна Нгэрм
Темы