обновлено: 03:46, 25 августа 2023
Няръяна Ӈэрм
Пыхыдаханда ена
Теда’ пудана по’ манзая’ няю’ тохолковы’’ ӈацекы’’ тохолковамдо’ ёльцедо’. Пыдо’ мале едэй илам’ пяӈгу’’. Хибядо’ хурка сехэрым’ ханаӈгу, ӈамгэ манзаям’ пяӈгу, харе’’ няридандо’ ӈа. Ханзер’’ ибедормамдо’ пыдаридо’ вадець пир’’ӈадо’.
Время для чтения ~ 6 минут
Тандая’ тохолко малевы нява’’ лаханако ня’’ӈаваць. Пыда Сёяха выӈгана вадёвы ненэць’. Соя’’ма яляхананда тёняӈы мякана ӈани’ ӈопой ӈацекы соявы. Тамальӈгана ты пэртя’’ матотава’ ялям’ мэ’’манзь пэрмы’’, ӈопой ӈэсын’ ма’’лёвы’’. Пирдырмамдо’ хуняӈы ялян’ тэвравэдо’. Тадхав’ хуняна ӈэдалёрмы’’. Сямянхат мере’’мыдо’ ты ня’’амвы’’. Нюртей ян’ Худи еркарм’ мэта ха’’амвы’’. Ӈадьбята няхатата мере’’манда няю’ едэй соявым’ Матотанаӈэ нюмдевэда.
— Пунахав хардан’ тэв’’махадани небями няни луца нюмам’ тавысь. Матвейӈэ си’’ми нюмдесь. Тенат’ ӈод’’ падаркана тарця нюмам’ мэ’’ӈадм’. Еркарами Вануйто. Ненэцяӈгаваха’’на Сабыва’’. Вануйто’’ тэнз’’ мале сян’’. Махако’’, Неро’’ таня’’ма, тамна ӈани’’ танянакы’’. Нисями Василийм’ нюбе’’ӈась. Мале ӈахакуй’’ похо’’на яӈгумась. Небява’’ сидна’’ вадабись. Нисяни ӈарка некам’ тёняна ня’’ӈаваць. Пыда сидна’’ нядабасеты, табекосеты. Мань ӈарка нями ӈани’ тэхэ’’на мэсь. Ты манзаям’ минре пир’’ӈадась. Тохолко мале’’махадани ӈоб’’ некахани хой’ ня нядаӈгованзь ханцетыдм’. Тедахав’ мяни тер’’ мал’’ ӈарка ненэцяӈэ хая’’. Нюдяко нява’’ тюку по’ 9 классм’ ёльцесь. Ти, тарем’ хар’’на’’ вадёданаваць. — Ты’’ мякана иле’’мямда Матвей тензибтемби.
Саляӈгардахана тет по’ ямбан’ ты’’ лекар’’ манзаям’ тохоламбавы. Ӈамгэ тарця серм’ тэравы ӈэбта, Матвей харта вадетада:
— Хасава юдимдей классахана мэвани мальӈгана ты’’ лекараӈэ хэсь таславась. Тамальӈгана тарця манзая нядани хахаявам’ сававна хамадамбивась. Школа’ пуд хар’’н ини ватом’ мэ’’ӈадамзь. Ханя’ хэвами, ӈамгэм’ пэрмами ӈахакуд теневавась. Си’’ми хибяхарт тарем’ нись табадамбю’’, табекодами ӈани’ яӈгусь.
Таминда тамна тяха’ тохолко хэвы. Падрода Саляӈгардан’ ханавыда. Тикы’ хавна падрода Новой Уренгоян’ ӈэдарамбавыда:
— Ӈарка неками ма’’нисяв, падрод таня’ мисан’’, я’ индадм’ нэкалпадаӈэ тараӈгун. Нянани сабе пойда то’’олха нись ӈа’’. Ты пардонтамбван’ харвана то’’олхадамзь. Пуна ханзер’’ харвасадм’ тарем’ еремясь. Теда’ техникумамами малев. Тохолкова’ падарми ня’’мав. Падыбавы манзаями ваде’’ӈав. Тад нерня’ ты’’ лекараӈэ тараӈгудм’, вымна ӈэдалёртадм’. Харвабта, Ямальской районан’ манзараванзь ханданакэдм’. Тарем’ ядэро’’мини мале таня’’. Небой та’ Панаевск’, Яр-Саля’ хой’ нямна тирӈадамзь. Тикы манзая’ харам’ серта сер’’ теневав. Нюрте’’э сидя сян по’ манзараӈгудм’, таддикахад армиян’ хандадм’.
Тэравы сехэрэмда етри’ нёдаӈгуда
Тохолкованда ямбан’ сита хой’ тер’’ нида, тохолко ня’’мыда, юрёда нядабавы’’. Матвей ма’’нисяв, нида ихинанда ӈоб’’ мэӈгу’’:
— Сяхари’ нина’’ ӈани’ хомбаӈгуна’’. Мал’’ ӈобкана ниб’’на’’ ӈод’’ ма’’люр’’, тюку илаӈгана телефон таня’’. Хибяна’’ ханяна мэвам’ ӈоб’’ хонрамба пир’’ӈава’’. Поёна’’ ёльце саваць, хусувэхэт ӈобкана ядэрцетыва’’. Нини сававна пыхыдадо’ манэ’’лабтамбая’’, нерняӈы иландо’ ханзо’’ӈая, сенз’’ ӈэя’’.
Ӈэрё’ няна пыдо’ е’’эйдандо’ едэй’’ ӈацекы’’ тута’’. Сита тотрев’ несэй илам’ торомдамбаӈгу’’. Едэйвана тованда няхата ӈани’ вади мэ’’ӈась:
— Ӈацекы ӈули’’ нюрте’’э харта таслабта тара, ӈамгэн’, ханя’ харва, ӈамгэхэна пир’’ма сер’ ӈада. Тохолкованзь хэва’ ёльцяӈгана хари’’ ӈэва манзарабта тара. Ниб’’ хамэдамбю’’, я’’маркаб’’, нюрте’’э ханяхавана тэри пыхыдаб’’ хорпаӈгун. Ӈамгэхэв манзаям’ торомбадаханд харт ир ядэрць пэӈгу’’, тикым’ пир’’ма сер’ ӈар, нир. Нюртей по’ тохолко пэвы ханя’ сейда пин’’, тарем’ илевы нинё’’ ӈа’’. Пинбата вуни серос’’. Ненэцие’’ поӈгана иле тохобата таранив’’. Харта нерняку ӈэӈгу, сита нядабада’’ харто’ ӈадиберта’’. Хибярихи’’ тэяӈгу, нянда ӈобтикы тэяӈгу’’. Сяхаринда ӈаркарка ням’ хонрамба серо’’ӈа. Няр сит нядаӈгу, пуна пыдар ӈамгэхэвана нямд нядаӈгур. Нюдяко’’ няха’’нана’’ нисетыва’’ сас’’, нина’’ нядабасетына’’. Сяхаӈгав’ маня’’ ӈани’ сито’ ӈарва’’ ӈэвыва’’ нивам ӈа’’.
Хусувэй ӈацекэхэна ӈарка хардан’ илелма тоена пэрӈа. Матвей ехэрана илм’ мер’ тохолавэда:
— Нюрте’’эри ханя’ хэсь таравахад ехэрадамзь. Хубтахана юркормар вэвава. Торомбэй’’ нини хонрамбасетыдм’. Интернатхана илевэхэ’’на нензел’’, мяканандо’ вадёвэхэ’’на тоенарка. Тохолко пэ’’махавахад мале пуня’ вунин ӈэӈгу’’, нит сер’ тэри санарт’’ нинав’’. Илесь харад’’, ӈолава’’, хусувэй илаӈгана тарана ӈамгэ таня. Мань тюкон’ тэвавани мальӈгана хар’’на’’ ӈаврадава’’ пирембиваць. Ӈаварм’ пире ехэрадамзь, янамбоковна тухудамзь. Ӈаябад ӈамзахавм’, халяхавм’ мякадани ӈэдарамбасеты’’. Харе’’ мякадани товы’’ ӈамгэ’’ ёльце ими савумдамбасеты’’. Теда’ тарем’ тасламбив, манзара пэ’’махадани выӈгана илена’’ нини мань нядабаӈгун.
Матвей, минрена серт’ нерняри миӈая. Янд тер’’ ненэцяӈг’’ ӈарка таром’ ха’’аврамбю’’. Тюку яля’ ханзер’’ пыхыдаханд пунрын, енан, пилибт’’ тарем’ пунрю’’, ена’’.
Автор: Анна Яптикы’ падвы
