обновлено: 04:46, 22 ноября 2023
Няръяна Ӈэрм
Пытатуӈ мянаԓьш конуԓпи”
Вяԓкуԓоԓяш’’, хамуԓяш’’, шуԓьвиԓяш’’, тупкам модюпишь’’. Пиԓи нюӈк, нэхэта’’ ӈашки’’ мянаԓмантуӈ мэт ӈопт ӈомаш’’. Таԓкахана Северное многоборьеӈ дет тонԓюта соревновании’’ мэӈаш’’.
Время для чтения ~ 2 минуты
Мат’ дют ӈок спортсмен мянаԓмантуӈ мэты ӈомаш’’. Школа -интернатхана тохоԓкота’’ ӈашки’’ камна Таԓкахай колледжхат мэна’’ мянаԓяш’’. Спортсмены’’ хампԓяӈк Северное многоборье дет тонԓюта’’ спортхана пытатуӈ конуԓпиш’’. Шанат дяԓи мянаԓяш’’. Неԓьчеэй няна пихиня мянаԓяш’’, няԓяӈк паӈк вяԓкуԓпиш’’, тупкам ӈятпиш’’. Ӈаԓка’’ ӈашки’’ поӈкна нюча ӈашкиуди’’ мянаԓяш’’. Пиԓи нючаудитоӈ шеӭв потуӈ.
Северное многоборье — выӈкна диԓина’’ нешади’’ дилхат ӈычимы спорт. Таԓям выӈкат тохоԓкош томы’’ ӈашкиуде’’ таньше шана’комам хашаӈошту’’. Вяԓкуԓоԓьш, тупкам ӈятпёш, ӈашкиуде’’, чешчам ниш’ намтоԓ, ваԓэхэнтуӈ мянаԓяш’’. Ха’та меԓьшахана тупка, шетшапта ӈотнаӈ, куптаӈ ӈайтанана ниӈа. Чикехена ӈотнаӈ ӈятпёчитуӈ тупка’’ хомана куптаӈ камаштуташ’’. Няхаԓ хамхана хамоԓьш, кану’’ хамуԓпёш’’ школантуӈ залхана шана’куш’’. Тренертуӈ Илья Макаров маньшту, ӈашкиуде’’ хомана нюӈкмана мянаԓя’’. Каса’’ ӈашки’’ поӈкна не’’ ӈашкиуди’’ чепиԓя’’. Таньше шана’кош кукиты тамна нючаӈэ тохошту’’.
Выӈкна диԓина’’ ӈашки’’ вяԓкуԓоԓмам ни’дехеԓа’’, кану’’ нимня хомана хамоԓьшту’’. Куптат шана’кота’’ таԓям мянаԓмам хомана каматымпитуӈ. Чуки соревнованихина ӈашкиуде’’ хомана нюӈкмана хамуԓяш’’, вяԓкуԓоԓяш’’, шуԓьвиԓяш’’. Ӈайвахай местам канамы’’, хомана мянаԓмы’’ спортсмены’’ навэт районный соревнованихина мянаԓты’’. Деты пуӈ неԓьчеэй диԓихина Кубок Пуровского района дет тонԓюта чемпионат ӈайты. Таньдёԓьшкана Северное многоборье дет ӈайта спортхана мянаԓмантуӈ мэт шанат каԓтыхит мэна’’ Таԓкан туты’’.
Лариса Айваседо патмы.
