Няръяна Ӈэрм
Саӈговота не’’ няд’’ма’’
Округханана’’ едя’ ниня мэна не’’ «генетические исследования» нюбетам’ серта пирта’’. Тикы программам’ няхар’’ по ямбан’ тидхалембаӈгудо’.
Время для чтения ~ 2 минуты
Нюм’ хован’ харвана’’ ӈахакуд нюто’ вэва хабця’’ танявахад, варюци’’ ӈэвахад теневаӈгу’’. «Неинвазивное пренатальное тестирование»м’ сертабаӈгу’’. Тарем’ ненэця’’ харто’ вэявнандо’, невхы паӈгханандо’ хабцяӈодо’ танявам’, яӈговам’ манэ’’паӈгудо’. Тад пуна савумда пиртыдо’. Ямалханана’’ 2020 по’ неняӈг’’ ирыхыд тарцям’ сертаба пявыць. Мале ӈока иследованиям’ сертавыць. 2021 поход саць вэвако, ненэцям’ мюняд ӈаворта хабцяӈгана хаӈгурти манэ’’саръядо’, етя проектм’ сертавыць. Хабцянзавэйм’ хобто’, няданда переня нида ӈани’ манэ’’сартыдо’. Тамна’ тяха’ сававна манэ’’манзь лекар’’ тидхалембаӈгудо’. Ненэцие савумдамбава’ мякана хаӈгуртам’ вэямда манэ’’манзь ханаӈгу’’.
Тюку похо’’на хуркари’’ едэй мутратна’’ ӈамгэри сертаби’’. Тарем’ ненэцие’’ хабцяӈо хомби’’. Едя’ ниня мэна’’, нюдо’ тандая’ соявы’’ не’’ е’’эмня «родовой сертификат» нюбета серм’ 2006 поход ӈадимдевыць. Не’’ лекар’’ мякана ӈаводикы серка’’на сертификатм’ няд’’маӈэ мэ’’ӈадо’.
Ӈани’ ӈопой сава нядаӈгосэй — «Ямальской маме» нюбета проект. Ямална’’ ӈэвахана мэна ервана’’ табековна сертабидо’. Саӈговота’’ нехэ’’на мер’ тараванда ӈамгэри’’ ӈэсям’ мипаӈгу’’.
Саляӈгардахана тикы’ няю’ яӈга тасалковам’ мэ’’ӈаць. Тарем’ ӈобанзер’ ӈэся’ мюй’ ӈамгэм’ термамда манэ’’сарӈаць. Тандая’ хор’’ иры’ сибимдей яляхана нюм’ ховы не’’ «Ямальской маме» нюбета падкодо’ мале ня’’мавыць. Терданда сидя сорочка, халат-кимоно, сидя сяд’ тэця’, тамна ӈани яёл’’ ӈамгэрико’’ ӈэвы’’.
Тарця ӈамгэри’’ ӈэсям’ ӈуда’ терӈэ хусувэй едя’ ниня мэна нехэ’’ мипаӈгу’’. Выӈгана иленяха’’на саць ӈарка таром’ минреӈгу. Лекар’’ мят’ паромба еремэхэна нензел’’ ӈэӈгу.
Ӈахакуд хардан’ тэвавы’’ тикаривна лабкавна ни’’ ядэрт’’. Таддикахад округна’’ тяхана ӈэда марка’’на нюдо’ хомбада’’ ӈэрм’ яна’’ тер’’ не’’ ӈани’ тарця ӈэсяӈо ня’’марпаӈгу’’.
Автор: Руфина Окотэтто’ падвы
Авторы
Няръяна Нгэрм
Темы