Няръяна Ӈэрм
Сайнорма’ по’’ тен’’
Саляӈгардахана ӈэрм’ тер’’ ма’’люрӈаць. Победа’ ялям’, невхы’’ сайноро’’ми’’ по тензибтембиць. Хусувэндо’ ваде’’мандада танясь.
Время для чтения ~ 2 минуты
Тарем’ ма’’лёвам’ «Ямал — ню’’на’’ я’!» Ассоциация’ тер’’ минредонзь. Хаданана’’, иринана’’ ня ӈобанзер’’ Победа’ ялям’ ивхалпиваць. Ӈармы’’ нина’’ сайноро’’ми’’ по ваде’’ӈаць. Поӈганандо’ теда’ сайнормахад товы’’ илебей ненэця’’ ӈани’ таняць. Пыдо’ невхы’’ иринато’ тотрев’ ӈобтикы варемдо’ мэ’’ӈа’’, Победа’ ялям’ хахаялтемби’’.
Борис Григорьевич Шушаков, Советандо’ ӈудондана лаханась:
— Ӈарка сайноромахана мэвы’’ нина’’, мядона’’ тер илева’ ямбан’ тенейна’’. Хусувэна’’ хибяхавада саю мардава’ няю’ ӈарка таром’ ха’’аврамбись. Ханяӈы’’ сайнорӈаць. Мякнато’ хаёвы’’ манзараць: ханець, халядаць, тыдо’ пэрӈаць. Ӈани похона ӈани’ тарем’ ма’’лёхова’’, сензаӈэ илехэва’’, илебей’’ ненэциена’’ нерня’’ тидхалембахава’’.
Вадида вадесо’’махаданда, ирива’’ ӈармы’’ ненэцие’’ совет’ терха’’ ӈуди’’ тер ми’’ӈась. Помнандо’ ядэрмани сер’ Елена Николаевна Ӈокэйм’ лаханако ня’’ӈадамзь. Пыда ӈацекы ӈэ’’мямда ваде’’ӈась:
— Мань нисями сайнорманзь хаясь. Ленинградской областьхана саю мардамбись. Пуна таняд нись ту’’. Яӈгумысь. Мань ӈацекэдамзь. Ӈыд хардакохонана’’ Победам’ намдаванда сер’ небями няръяна имбытами екадась. Тад пуна паркхая пян’ сэлӈадась. Няръяна лабкадамдо’ серта’’махадандо’ харад’ помна минарӈадонзь.
Та’ мальӈгы’’ по манэ’’мы’’ невхы’’ иле’’мидо’ сейто’ няркомба тензибтембасетыдо’. Лаханакурць ня’’мы хадахани сава вади хэтадамзь. Тюку ма’’лёвахана пон’ нивы маниевы нини’’ манэ’’ӈадамзь. Ӈармы’’ ненэцяӈгат ханяӈэхэ’’на илаӈгана тарана’’ табеко намдсетыва’’, сидна’’ тидхалембасеты’’. Пыдо’ иландо’ ямбан’ манэ’’мэдо’, намдавэдо’ ӈока. Тедахарт сенз’’ ӈэя’’.
Автор: Руфина Окотэтто’ падвы
Авторы
Няръяна Нгэрм
Темы