Салабам’ няби сырам’ есьпа теневана’’

Китай’ няна Харбин хардахана салаба’ няби сыра’ фестиваль ӈась. Я’ ханярид ӈэда’’ ненэця’’ помнандо’ пирдырӈаць. Тарця ё’’ тер’’ ма’’лёвы’’: Россия, Китай, Испания, Монголия, Перу, Корея, тамна ӈани’’. «Мир льда и снега» сырэй паркхана мэвы’’. Фестивальм’ 1963 похона минре пявэдо’. Тикы фестивальм’ саць ӈаркаӈэ ваде’’ӈадо’. Ӈани’’ поӈгана тетимдей яхана мэсь пэртарха. Теда’ похо’’ минредо’.

Время для чтения ~ 4 минуты

Таня’ Тарко-Саля’ тер Сергей Ледков хан’’ӈась. Ямална’’ тер Якутия’ няд ӈэдаха’ ня’ ӈопой манзаям’ ӈадимдевы’’. Невхы лаханакохот не’ мирбярхам’ мивы’’. Манзаядо’ «Луна» нюбе’’мы. Мэта сырадо’ ненэй нивы ӈа’’. Сирё’ сертабада ӈэвы. Нумда ибаӈэ еремы. Пэвсюма’ нярина тецьхавормы.

Сидяӈг: С. Ледков’ тавы

Сямянхат ва’’лёйдо’ ма’’лёвы’’. Хусувэдо’ теневабцода сававна манэ’’лабтаван’ харвавы. Ӈадьбята ӈамгэм’ пир’’ӈа’’, мал’’ манэ’’лабтавыдо’. Яхадана’’ ядэрта’’ нина’’ ӈани’ варемдо’ мэ’’мы’’. Тасалкодидо’ сертавэмдо’ ёльце саву’’мэдо’. Ӈэрм’ няд товы нябимдей ян’ ха’’авравыдо’.

Нерня’ еремядо’ вырэй, мел’’, манзаямдо’ тид’’ теневавахадандо’ няби мэневахадандо’ пере. Таддикахад тикэдо’ илевандо’ ямбан’ минрена серто’. Сергей Ледковм’ яна’’ ханярина теневавандо’ хавна, юнда ӈани’’ ё’’мана ӈани’ ядэрӈа. Пыда нямдхад, пяхад хуркари ӈаво мимбсеты. Пирдырмаха’’на етри’ нерняна мэсеты.

Салабам’ няби сырам’ есьпава’ пирдырман’ нюртей мэва’ хан’’мы

Сидяӈг: С. Ледков’ тавы

— Якутия’ няд ӈэда няхаюни’ си’’ми хаӈаханзь. Тамна ӈопой ненэця’ нянанди’ таравысь. Нерня салаби есьпавы’’. Тикы’ пуд сырам’ есьпава ӈэванда ӈэвы. Мань яносарка хаядамзь. Новой Уренгой’ няна «визам’» сертадамзь. Падрони хамэда’’махадани лимбя’ иры’ 2 яляхана еся сехэрэвна Екатеринбурган’ тэвыв’’. Пуна тиртя ӈанохона Владивосток’ ӈэсонд’ хаядм’. Таняд Харбинан’ тияв’’. Тиртя ӈано’ ӈамдолаван’ тэвба’’ни тоенаркась. Хусувэй падар’’ ӈани я’ вадавна ӈась. Вадам’ ехэраб’’, нензел’’ нивы ӈа’’. Мара’’, си’’ми нядабадини таняць. Тикахавахад сензелава’ хардахана’’ сидна’’ тэвраць. Таняна луца’ вадан’ тоходанана’’ ӈатенавыць. Лакамбой’ нюмдандо’ луца’ нюбе мэць таславыць. Пыдо’ сидна’’ ялэхэ’’ манзара ё’’на’’ ӈэсонд’ ядэлаць. Нюртей яляхана мэкад серт’ еремядамзь. Хубтахана юркыв’’, часан’ сырӈадм’, мале хасава ю’’ часӈэ хэвы. Паромбари ятна пэяв’’. Ханяхартана хибяхарт яӈгу, ма’’нидам, мал’’ хэрхавынё’’, тарси’’ вэва, ханзер’’ ӈэӈгудм’. Тикахана манзарана нем’ лаханако ня’’ладм’. Нини’ вунини’ хамэдамбю’’. Луца’ вадам’ теневанарка нем’ хаӈа. Няни часда манэ’’лабтамби, ма’’нив: «Теда’ тамна хонёва’ ёльць’». Ехэрана яхана ӈули’’ сава ӈэвы. Ненэся ӈаврато’ тэнз’’ ӈули’’ яӈгавы’’. Няньм’ ниваць ӈор’’. Ху ни’’ мэс’’, ябтако пякоцяха’’на ӈорӈаваць. Нюрте’’э’ вэваркась, пунахав’ тухудамзь, ӈорман’ харваӈгун’ — сямян ӈамгэн’ тоходан, — Сергей тарем’ лахана.

Салабахад, сырахад наӈэдя едэй харадм’ ӈадимдевы’’. Лаханако ня’’мы нями ма’’нив: «Танямна ядэрп’’, лаханакон’ тэвнархан’ ӈэӈгун. Яля’ сэвхана тэри салмаӈга’’, пэвдяхана ялкадырӈа’’, ябере’’».

Автор: Анна Яптик’ падвы

Авторы

Няръяна Нгэрм

04:40, 29 января 2024

Темы