обновлено: 05:52, 26 октября 2023
Няръяна Ӈэрм
Тохолковы
Тандая’ март’ Я’ мал’ тиӈгэвна илена’’ ӈацекы’’ турмы’’. Юдимдей няби юкад вата нюртей классахана мэна’’ товы’’. Няӈэдя си’’ив яля’ ямбан’ теневабцодо’ Саляӈгардахана ӈокамдамбавы’’.
Время для чтения ~ 2 минуты
Пыдо’ тэри тарем’ нивы’’ ту’’. Нямэхэна маламбой’’ округна’’ ӈэвахана мэнахад «Гению Ямала» сертификат ня’’амвы’’. Самляӈгари, тетри ня’’марпавандо’ няю’, олимпиадаха’’на ва’’лёйвана паднавандо’ няю’ сиддо’ есяха’’на нядавы’’. Ӈокханда тет ю’’ ӈацекы ӈэвы. Таддикахад хасава ю’’ ӈарка ненэця’ — ӈацекы маниена’’, ханяримна ядэлана’’. Пыдо’ илесь мято’ «Центр выявления и поддержки одаренных детей» нюбе’’мы. Сяхаӈгав’ ӈахат яхананда санаторно-лесной школа ӈась. Теда’ тикан’ мале сян ялян’ школахана тохолкода тэволасеты’’.
Нюдяко’’ хардахат, маркат товы’’ ненадовна обществознаниян’ хамековы’’. Олимпиада ва’’лёйвана падыбади’’ Ассоциация тер тохоламбадаӈэ тарана’’ сиддо’ тохоламбавы’’. Хуркари серо тасламбавы’’. Тюкон’ тур’’мандо’ пуд экзамен’ мипава’ ёльцяӈгана нянандо’ нензеларка ӈэӈгу, теневанадо’ ӈокарка ӈэӈгу. Мань тохолковани мальӈгана тарця яӈгусь, хар’’на’’ ханзер’’ пир’’ӈава’’ тарем’ пирдалембиваць.
Тет ю’’ ӈацекы’’ поӈгана Ямальской район’ тер Ольга Яптик мэвы. Пыда юдимдей классахана мэ. Ӈэдалёро’’мита нямна лаханась:
— Мань нюртей ядэро’’мами. Ёльце сава ӈэвы. Етри’ паднаваць, олимпиадан’, ЕГЭн’ хамекуваць. Ӈанихи’’на ӈани’ олимпиада падыбаван’ харвадм’, нерня’ ерембани яӈор’’ тутадм’. Ӈани’’ районхат ӈэда нини манэ’’ӈадм’. Теневанани тамна ӈокма’’. Е’’эмнана’’ хуркари мастер-класс хамэдавыць: ӈамдэдо’ вадабава, квадрокоптерм’ мэць хорпава, сяд’ хобам’ варепада лансякм’ сертабава. Тикы’ хавна Обдорский остроган’, Горнокнязевскан’ хан’’ӈаваць. Этнопарк’ няна лески ябцыбиваць, мяд’ мюня сяйӈаваць.
Нюдяко’’ хардахат ӈэда’’ ханяримна ӈэдалёрпато’, марад’ илам’ теневаӈгудо’. Манэпадидо’ таняӈгу’’, тохолко варемдо’ мэта’’, яля’ няю’ ладарта ненэцяӈэ вадёданаӈгу’’.
Автор: Анна Яптик
Сидяӈг: О.Яптик’ тавы
