обновлено: 03:46, 25 августа 2023
Няръяна Ӈэрм
Саӈода па’’мя ненэць’
Маӈгты’’ иры’ 16 яляхана Горнокнязевскхана ненэця’’ ма’’лыць. Таня’ сиддо’ юнета нява’’ Хабэча Хываревич Яунгад ма’’лась, похо’’ тадтамбавы’’ сидяӈгада манэ’’лабтамбись.
Время для чтения ~ 3 минуты
Хабэча Хываревич илеванда ямбан’ сюртевы яда ӈока, хусувэйхад едэй сидяӈг тэврамбасеты. Тадтаӈго мэтада няданда ӈоб’’ ни хаюрцету. Сеӈгбям’, сэв я’’лам’ ӈатена ханенадрев’ тадтаӈгосеты. Сямян манэ’’мэда сава сидяӈгаӈэ хан’’мы. Сидяӈгаханата ӈарка таӈго ява’’, ненэй ненэцие’’ илам’ манэ’’лабтамби’’. Тадта’’махата саӈом’ ӈэдараб’’, таминда вынд’ тэвана, харт танямна ядэртархан ӈэӈгун.
Товы’’ сава вади мэ’’ӈаць
Нюрте’’э ӈэрм’ тер’’ серо минрена департамент’ манзарана вадам’ мэ’’ӈась: «Хабэча Яунгад невхы иландо’ саирм’ минрени илам’ ӈадимдемби. Яркулана’’, ватаӈгода’’, ханена’’ хасава’’, сэдорана’’, ӈацекы’’ — мал’’ таня’’. Сяхари’ ню’’на’’ ню’’ ӈока’’ по’’ хэ’’мяхад тюку илна’’ хурка ӈэ’’мям’ сидяӈгахана манэць пиртадо’». Пуна «Ямал-ню’’на’’ я!» Ассоциацияхана мэна Галина Косыгина мась: «Ямалхана илена ненэця’ сит тенева. Тадта’’мид манэсармани сер’ теневана’’ нини’’, ты, мэнена ями манэ’’ӈадм’. Тад нерня’ выставкыд етри’’ ӈадиберӈая’’. Сензан ӈа’’».
Ненэцие’’ поӈгана яна’’ сёётэй не Надежда Сэротэтто мэсь. Сейхад минда вади хэтась: «Хабэча Хываревич мяни тер’’ сава ня. Нюдя ӈэдахани теневав. Сяхаӈгав, сыра’ Панаевск’ хэвувна Сёяхан’ ӈэдалёвысь. Нянанда нюкця вэнекоцямда минревысь. Мяканани мядоӈась. Вэнекоцямда няни тадась. Тарем’ Пуроми ӈадимясь. Тикы’ хавна «Сэройко», «Нюкубц» сёхоюни’ вада пыда падыдась. «Сэройко» сём’ мале сян по’ няданда ӈатевась. Пуна нисяни ня’ хар’’ни’ Саляӈгардан’ хаянинзь. Нянда ма’’нидам: «Сёдами сяха’ падаӈгун? Тедахав’ мань хар’’н тодм’. Тамбирувна ӈатена’’махадани сёмда самляӈгари минута падыбидась».
Неняӈг’’ иры’ 17 яля’ ӈэсонд’ выставкада минда. Ӈадьбята тарем’ ерембата сидяӈгаданда’’ манэ’’манзь хэида’’.
Анна Яптик’ падвы
