Няръяна Ӈэрм
Сарё’ нюрцьбя
Нум’ саляхана мядэва’’. Ӈарка нябакоми ненэй мякана иле. Мань харад’ терӈэ та’ ямбан’ мядоӈадамзь. Хой’ няна ханя савакоко! Ини вато! Хусувэй харта манзаямда пэрӈа: халям’ пэртя’’ — халям’ хадаби’’, мэятана’’ — мэята’’, сэдорана’’ — сэдора’’. Мараӈга’ ёльцяӈгана, хусувэй яля’ таӈгава’ сер’ мараӈгацям’ ма’’ламбива’’. Ӈум’ саля ӈули’’ мараӈга’ я ӈэвы. Наӈэдя едхана ма’’ламбива’’, ӈодь варер мэс’’. Тамна ӈэрёй’ няна нярьяна ӈодя’’, лынзермя’’, ӈабтеня ӈодя’’ сидна’’ ӈате’’. Харто’ ёльцяӈганандо’ тута’’. Ӈэрёй’ няна сарё’ ельцьӈэ хая: пэвсюмя’ няна яля ӈадимбата — хубтахана сарё ӈэӈгу.
Время для чтения ~ 5 минут
Хубтакохона юркмахадана’’ сяйӈава’’. Манзаина’’ тасла’’махад хыдина’’ тэпива’’, тольва’’ хабтомдамбива’’. Синяна нарам’ ни’ хыдини ӈабтамбидм’. Нябакоми лакри’ ма’’нив:
— Тарси’’, хани мюй халакабтавонда!
Ма’’нидам’:
— Сомбовна хулцотава, ӈамгэ тикы ханд мю’ еремакы.
Хадами ма:
— Тарем’ якхавабта — сарём’ пэрӈа.
Хамда хулцопадаханда сарюв нив’’! Сарё’ тэс’’ парасин’ нимна токада’’…
Мань тэри васарӈадм’:
— Тарси’’!!! Ханда си яка’’хамад сарё пэй’’! Тарси’’ мэкад!!!
Ӈани яляхана махада яку. Нябакоми ма’’нив:
— Сюдыни’’ якхама’’, ӈани’ сарёманда ӈэдакы.
Ӈамгэ ӈэса — ӈани’ сарёмя! Тэс’’ мяд’ ни’ тэри ха’’морӈа’’! Пин’ санэйв’’. Ненэся ӈод’’ сарё миӈа! Ид’ тэс’’ ӈэвани ни’, сякни ха’’морӈа’’. Саць ӈарковна тэри васарӈадм’:
— Тарси’’ мэкад!!! Ӈодь ӈамгэда якахамда, таминда сарёмда! Тадебян?! Тарси’’ мэкад ӈэвы!!!
Нями няни сылы’’, нись писянзь ма’’нив:
— Тарця серони’’ танясеты’’.
Хоркы’ евэйкоцям’ пире’’махадани, сомбовна ӈормахадани, манзаина’’ пэраць пява’’. Яля’ ер’ пуд поёрманзь хаяни’. Яляда тэри хамбалта, мерцяда хэнома. Ӈыльняку ха’’мотани’, неняӈгаця’’ пюӈг’’ поӈгад сят’, сэв’ син’ лабцеӈга’’. Поёрӈани’. Лакри’ нями ма:
— Нирцьми якахама. Ханзер’’ мэб’’ни сава ӈэдакы? Тарем’ сяни ний якбата, ӈани’ сарём’ пэрӈа.
Ненэся ӈод’’, лакри’ сарё’ тэс’’ ха’’молыд’’. Неняӈгацяни’’ пусейд’’ — токоцидо’ санебатум’’. Сарёми сацярка пянарахада. Мани’ паромба пини ма’’лани’, иняхана сяро’’яни’, марцьни ни’ моё’’яни’. Паромба мякани’ сюрбыни’. Сехэры’ сер’ нями тэдорпив:
— Сян сер’’! Ӈамгэ теда’ нирцяр яку! Пи’ мякана мэсь якаява!!!
Пумнанда ядам’, сехэры’ ямбан’ тыбнорӈадм’:
— Сарё пэртян’ ӈэб’’нанд, ӈамгэ сарё’ помна ядани’! Хэвнякумна хэрабтамбанама!
Нями мунзи. Нерняку пэрӈада. Манзетыдм’:
— Тарси’’ мэкад ненэцянд ӈэвэн! Хадани тадейбцо’’ нянд ха’’амвакы’’?!
Пэвсюмя’ ямбан’ ими ядэрӈа: «Ханзер’’ тарем’ ереберӈа?» Ханзеркарт тасла я’’ма хонаравэв, пи’ немахани ха’’амвэв. Хуняна то’ няд миӈадм’. Ед’ тер’’ идм’ минедм’. Ныланавани сер’ хано’’ тяхад талерка маниев. Нябакоми пин’ тарпы’’, сидя ня’ вэдерӈа, си’’ми ни манэс’’. Мань хано’’ тяхана мэдм’. Ӈэвамда тю’’у’ мэхэя, тю’’умна сырӈа, нумгана мяд’ нимна тованда паридена сарё’ лабц тире манэ’’ӈа. Тир’’ халкоця’’ миӈа’’. Нябакоми мят’ мятю. Паромба едни ня’’амхая мяд’ ёльцянд ядадм’. Хан’ ни’ едни ӈабтэян. Пумнанда мят’ мятюдм’.
Тикы нями ӈани’ халцена пэй’’, ма’’нив:
— Сюдыни’’ якхама’’, ӈани’ сарёманда ӈэбтав?
Манидам’:
— Хор’ вадам’ ханаӈгудм’. Хор’’ еся вадахана сюдыд хадетын! Сит маниедамзь, сит хамэдадм’, ханзер’’ сарю пэрӈан!!!
Тарем’ мамадани лакри’ сарё пэй’’. Паридена тир’’ сарёмда халӈэ ха’’аврада. Нями ёльце письӈа. Нябакоми ма’’нив:
— Пунрёсан?!!
Ӈобтикы нянанда письӈадм’, мадм’:
— Ханёв! Ёльце пунрэйдамзь! Тадебяӈэ сит пэрӈадамзь!
Письӈгая пин’ тарпыни’. Сарё’ поӈгана письӈани’, сане’’махадани’, нями хонрав:
— Ханзер’’ ӈэвамда тасламбир?
Нябакоми ма’’нив:
— Сарё ӈэб’’нанда паридена тир’’ вархад лэбтана ӈамгэкоця’’ таняӈгу’’, тикахана хамэдаӈгур’’ — сарё пэӈгу’’. Тир’ вар’’ салмуй ӈэбта, сарёда яӈгода. Харад’ тер нида хамэдаӈгу’’. Ӈоб’ пихина мэна хой’ тер таслаӈгуда. Харад’ терхав ӈули’’ салемдараха’’ — тедахав телефонридо’, интернетридо’ мэ’’ӈа’’, яля’ сэвм’ манэць, пихиртан’ ни’’ хант’’. Интернетдо’ хабтабато’ ханзер’’ ӈэванда’’ ӈэдакы’’? Хой’ тер’’ иринадо’, хаданадо’, ӈарка ненэця’’ хусувэй ӈамгэн’ нюкцидо’ тохоламби’’.
Автор: Наца Худи’ падвы
Авторы
Няръяна Нгэрм
Темы