Няръяна Ӈэрм
Саць халцукей’’ сёбар’’
Тюку ныланава’’ яляха’’на Саляӈгардахана ӈэрм я’ тер’’ илебей’’ ненэця’’ футболхана сянакуць. Яр-Сале, Сёяха, Катравож, Харсаим, Салехард, МФК «Союз» команда’’ сидя яля’ ямбан’ помнандо’ пирдырӈаць.
Время для чтения ~ 3 минуты
Сянаковамдо’ мале няхаромдэй’’ ӈадимдембидо’. Нюртейдо’ 2021 похона округна’’ ӈарка маркана ӈась. Нябимдей’’ Нядаӈгардахана 2023 похона ӈобт’ ма’’лыць. Пирдырмамдо’ Ямална’’ ты пэрти’’ Союз, ӈани’’ общественной организация’’ тер’’ сертабидо’.
— Ӈацекы’’ тамна’ тяха’ сянакова’, нидо’ тохоламбава’, сёбар’’, яля’ ня’ ӈэва’ е’’эмня ӈадимдембада сер’’ма’’. Харвабта, сяхари’ ӈани’ ӈобт’ ма’’лёда’’, ӈобкана сянакода’’. Округна’’ серо минрена’’, яна’’ сёбар’’ серо тидхалембада департамент, Салехард’ сёбар’’ ненэцие’’ серо тасламбада управление мал’ нядаӈгуць. Пуня’ хибяхарт нись ӈа’’, — Ямал’ ты пэрти’’ Союз’ ӈэвахана мэна, Законодательной Собрания’ депутат Тимофей Нгэкович Лаптандер тарем’ лаханась.
Пыхыдадо’ етри’ тохоламбидо’
Ненэй ненэця’’, хаби’’, тамна ӈани’’ тэнз’’ варемдо’ мэ’’ӈаць. Няндо’ сырманзь товы’’ ӈани’ ӈокаць, хусувэдо’ харта харданда тер’ няю’ нятась. Ненэся мячм’ нёракутаха’’ сырап’’, ӈули’’ савась. Сёбар’’ сюрберпато’ ёльце мере’’ӈаць.«Сёяха» няби «Яр-Сале» пирдырма’ мальӈгана, ныланавандо’ сер’ нядандо’ хонаркудамзь.
Панаевскхана вадёвы Сергей Лаптандер Яр-Сале харад’ ед’ сянакоди’’ поӈгана мэсь. Салехардхана нюдяко ӈацекы тохоламби, садикха’’на сёбар серо минре. Футболхана сянаковамда тарем’ ваде’’ӈада:
— Нябимдей классахана тарця сянакубцм’ пявась. Ӈули’’ мэнена сер’’ми тев’ ёльцянд’ минрев. Сянакулва’ ява’’ харад’ мал’’ няна ӈа, таняна ма’’люрцетыва’’. Ӈоб’’ сянако нята’’ нини’’ «Восход»‘ тер’’. Си’’ив по’ тикахана мэдм’. Етри’ нерняна мэсетыва’’. Та’ ӈэвы чемпионатхана ӈобтикы сидна’’ ненадумдаць. Ӈани’’ хардо’’ нямна ӈэдалёрцетыва’’. Ӈопой ненэцялхава’’, ӈопой мандал’’ма’’ ӈэб’’на’’ тара, тикахана ва’’лёйва’’, нина’’ нерняна мэӈгува’’, нёдана мэйрёда вадава’’ ти.
Сёяха’ выӈгана соявы Давыд Окотэтто тэри мэванда сер’ ханяӈэхэ’’на футболан’ ядэрӈа. Сянакоди’’ ниб’’ товор’’, сяхари’ сита ханзь пэрӈа’’:
— Си’’ми етри’ ханзеты’’, мань ӈоб’’ пуня’ нисетыдм’ ӈа’’. Теда’ сидндетва’’, мал’ ӈопой яхад ӈава’’. Тюку яля’ варева’’ мэ’’ӈава’’, хаця’’ «Яр-Сален’» выдарава’’, нябимдей яхана миӈава’’. Сававна пирдырма’ е’’эмня ӈобарка пыхыдм’ высылпа серо’’ӈа. Сянакода мерепата, иӈудопата, мунзи’’ нида хамадамбата, хэвняна мэна нямда маниебта тара. Хараси’’ тэдорпата, тирцькобта вэва. Вэнзер’’ ӈэбат сит лакамбой’ ва’’лаӈгу’’. Ӈамдёдаханд ир ядэрта, ӈамгэ’ е’’эмня сит тэдорпавамдо’ тасламбаӈгун. Вунин нензюмд’’. Тэдорта няр вэваковна вуни лахан’’, сит табедамби.
Тэри сырманзь товэхэртаӈэ яляна’’ ханзер’’ хэвам’ ниваць хамада’’. Сянакоди тидхалембавы ненэця’ сюдрём’ намдава’’, тикахананда пыда ма: «Малейна’’». Сямянхат ва’’лёй’’ Яр-Сале’, Сёяха’, Катравож’ тер’’ ӈэвы’’. Пыдо’ хуркари тэнз ненадумда’’ми ня’’маць. Тарця сава сер’’ сехэрэда ямб ӈэя, хусувэй по ӈадиберӈая.
Автор: А.Яптик’ падвы
Авторы
Няръяна Нгэрм
Темы