Няръяна Ӈэрм
Сэдъида сава ихина сертавы’’
Округна’’ этнокультурной центр хусувэй по’ хуркари выставка хамадабасеты. Вэба’ ирий’ сидя ю’’ нертей яляхана мяканандо’ ӈока ненэця’’ ма’’лыць. Няръяна марад’ тер’’, ӈэсыхыт’ товы’’ мел’’мана сэдорана няндо’ манзаи манэ’’манзь товыць.
Время для чтения ~ 3 минуты
Кира Гончарук нюртей персональной выставкамда хамадась. «Ӈэрм’ яхана иледм’, манзарадм’» — тарем’ нюмдевэда. Ӈацембой некоця хусувэй сертавы манзаяханда инда ядэрабцо паклемби. Манзаида сомбой’’, мэкад’’, тёмбекавна сертавы’’. Нойхад паской паны, со’’ок, ты’ хобахад, пенахад сомбой ӈавори сэдыби. Ӈодякохот паӈгалмыда тянё ни’’ ӈа’’. Сэдвыта поӈгана ӈухуко’’ таня’’.
Кира Алексеевна 2021 похона нертей мэвна мел’’ ненэцие’’ мят’ тось, таняна «Мел’’ не» клубхана сэдора пядась. Сидя по’’ ваерась, ненэйвана манзаранаӈэ хая. Пыда хуркари’’ региональной, международной выставкаха’’ тэворцеты’’. Хусувэй яхад сава ненадумда’’ми тэврамбасеты.
Е’’эмнанда ӈока ихид минда вади намдаваць. Кира’ небя, Мария Николаевна лаханась:
— Тюку яля’ сейми’ маймби, иханани ёльце сава, не нюни манзаи тюкохона маниедм’. Нюдякоходанда пили’’ нядаӈгосеты, хуркари манзаяко’ падаркад мадабасеты… Теда ти’, ненэй сэдоранаӈэ хая.
Валентина Ивановна Дьячкова — тохолкода, Индига’ ӈэсыхы школа’ ервотаӈэ тарась. Харта ӈэсыхананда вадёвы не ӈацекым’ сававна теневада:
— Кира — маня’’ яна’’ тер, Индигахана школамда ёльцесь. Сертавы манзаида ёльце сомбой’’. Пыда ивъер’ манзарана. Пэдава!
Кира Алексеевна тет юкад вата манзаямда тэвравы, поӈгнандо’ париденя нойхад сэдвы канинской паны, тарцям’ хадада, Пелагея Игнатьевна мэ’’мысь. Тамна ӈопой манзаяда — нойхад сэдвы савак, нися’ хасанда, Алексей Николаевич Двойников’ тарцяда танявы. Тикы’ хавна падко’’, туця’’, ӈухуко’’, Нюдя, Канин’ я’ тер’’ паны’’, тамна хуркари’’ мел’’мана сертавы манзая’’. Няръяна маркана хор’’ ирий’ 14 яля’ ӈэсонд’ ненэця’’ манэць пиртыдо’.
Юлия Талеева’ падвы
Авторы
Няръяна Нгэрм
Темы