Няръяна Ӈэрм
Сёётэй муно намдавы’’
Маня’’ яна’’ тер’’, ӈани яхат товы’’ мядонда’’ Салехардахана ненадо серкана мэвы’’. Поӈганандо’ Ямал’ тиӈгэвна манзарана’’ школа-искусств’ тохолкода’’, сиддо’ тохоламбада’’ ӈобт’ ма’’лёвы’’.
Время для чтения ~ 2 минуты
Округна’’ нермбэртя Дмитрий Артюхов ненэцяӈг’’ вадамда мэ’’мы. Салехардахана КДЦ нюбета мякана ма’’лёвы’’, тикамдо’ несэй нюмгана нюмдевэдо’, тад нерня’ Ямальская филармония ӈэӈгу.
«Симфония Ямала» нюбета пирдырма яра иры’ 6 яля’ пэяць. Юнета пианист Денис Мацуев фестиваль’ серо тидхалембадаӈэ, нермбэртяӈэ тарась. «Скрипка», «виолончель», «фортепиано» тарця номинацияха’’на пирдырта’’ теневабцудо’ ӈадимдембавы’’.
Хусувэй ненэця’ мирци’’, инда харвабцовна таня’ хэсь пирӈадась. Бах’, Бетховен’, Чайковский’, Рахманинов’, Шостакович’, тамна ӈани юнета ненэцие’’ падвы манзаи Салехард’ тер’’ намдавы’’.
Ӈэрм’ яна’’ няна ӈэвы пирдырман’ Россия’ тер’’ хавна Китай’, Япония’, Франция’ няд товэхэрт’’ танявы’’. Сиддо’ тасламбада’’, сямянхат ва’’лёймдо’ поӈгадандо’ тэрабада’’ ӈобтикы юнета’’ музыкант’’, сянанди’’ я’ тер’’.
Сямянхат ва’’лёй’’ самляӈг юр’’ ёнар’’ пир’’ нюртей премиям’ ня’’амвы’’: Богдан Ефремов (виолончель), Стефания Поспехина (скрипка), Китай’ тер Мин Жуй (фортепиано).
Автор: Г. Кинчина’ падвы
Авторы
Няръяна Нгэрм
Темы