Няръяна Ӈэрм
Шуԯьвиԯяш’’, вяԯкуԯоԯяш’’
Нимимты дяԯяханантоӈ мянаԯта’’ таӈичохона мэта «Этно-биатлон» нимита эстафетахана пытатуӈ конуԯпиш’’. Маня’’ Пуровский районханана таньше мянаԯма мат’пуӈ чеӈай комытуӈ шеԯ.
Время для чтения ~ 3 минуты
Хыԯаӈ ԯампахана шуԯвиԯьш няԯяӈпаӈк вяԯкуԯпёшту’’. Таӈичохона манԯе нимимты пуӈ таньше шана’коматуӈ. Таӈи этнобиатлон хыԯы мянаԯмахат ӈинԯи. Пям няампёш шуԯвиԯяш’’. Матапёмытуӈ ӈотакотоӈ дямпаш, стадионмана шанат мэмаӈ шуԯваштуташ’’. Таньше шуԯвиԯмантуӈ поӈкна мянаԯта’’ няԯяӈпаӈк тыньшахана вяԯкуԯпиш’’. Кимя нита вяԯк, шан мэмаӈ ниԯиӈата, таӈок мэмаӈ штрафной круган кяштуш. Дячапётахана таньше мянаԯма неньшаԯ ниӈа.
Чики эстафетахана мянаԯчи’’ поӈкна няхаԯ нешаӈ нэхэԯяш. Няхаԯ’дяӈкня — хампԯяӈк’дяӈкня потуӈ ӈайта каса ӈашки’’ поӈкна этно-биатлонхана ӈайвахай местам’ Владимир Агичев канаӈаш. Мат’дяӈкня — шеcв дяӈкня потуӈ ӈайта ӈашки’’ поӈкна Сергей Айваседо нэхэԯяш. Ӈаԯка нешаӈкат этнобиатлонхана ӈайвахай местан ӈай Василий Салиндер ка’амдяш.
Чуки похона ӈаԯка дяханана — «Год семьи», Ямалхана — «Год детства». Таԯям этнобиатлонхана мят’чеԯ’’ дет ӈайта эстафетам шеԯтаӈаш’’. Няхаԯ нешаӈ мят’чеԯ’’ мянаԯяш. Неԯьня нешанатуӈ шуԯваштуташ, чикехет немянатуӈ, пиԯи путаш нитуӈ. Шуԯьвиԯмантуӈ поӈкна мянаԯта’’ няԯяӈпаӈк тыньшахана вяԯкуԯпиш’’. Мянаԯмээ’’ маньшту’’ таньше шана’кома неньшаԯ ниптаӈа’ ӈотнаӈ, дёԯьше вильӈа. Мят’чеԯ’’ дет ӈайта эстафетахана ӈайвахай местан Евгений Пяк, мят’чеԯ’’ ка’амдят. Тыта, пушадюм Татьяна, нюдюм Артём дёԯьше хомана мянаԯяш’’, шана’кош нямытуӈ нятуӈ неԯьня финишан тоӈаш’’. Нимимты местам Игнат, Виктория Пяк нюмч Марк няш канаӈач. Няхамты местан Роман Айваседо мят’чеԯ’’ ка’амдят. Нянанта мянаԯмэхэӈ пушадюм Светлана, нюньч нюувди Роман. Ӈупчики дёԯьше хомана шуԯвиԯяш’’, вяԯкуԯоԯяш’’. Мянаԯьш хитамахататоӈ хомана шана’комы’’, ӈайвахай местам этнобиатлонхана канамы’’ тотуӈ мячисы’’ — патԯу диплому’’, вешаӈ дет ӈайта сертификату’’ няамӈаш Таньше ӈопт ӈома, мянаԯьш шана’кома дёԯьше хома шеԯ.
Таԯьша мероприятии’’ ӈаԯтана’’ ӈашки’’ де’эмня таԯаӈа’’, навэт каԯьтуӈ тэмстуӈ дилм, ватам, культурам дюԯмантуӈ тайхана. Ӈэԯм’ чеԯ’’ нешади’’ дет ӈайта мероприятитоӈ чикиԯи’’ ниӈа. Пуровский районхана ӈука мероприятии мэӈаш’’. Чикина тат неԯьняӈ ӈай вачатайна’’, патнайна’’.
Автор: Л. Айваседо патмы
Авторы
Няръяна Нгэрм
Темы