обновлено: 11:57, 05 октября 2023
Няръяна Ӈэрм
Сямянхат харта вадамда теневана
Черкесск маркана вэба’ иры’ 18 яляхад 24 ялянда пират хари’’ вадан’ ӈацекы тохоламбади’’ е’’эмня сертавы конкурс ӈась. Нюмда «Лучший учитель родного языка и родной литературы» («Сямянхат харта вадамда, литературамда теневана ӈацекы тохоламбада»).
Время для чтения ~ 2 минуты
Тикы конкурсан’ Россия сяни’’ я’’ вэкат (субъекта’’хат) 72 (сидя юкад вата сидя) ӈацекы тохоламбада’’ тоць. Таняна 5 яля’ ямбан’ ӈаркавна манзараць. Урок, классной час минрець, ӈани’’ хуркари’’ манзаи сертабиць.
Ямал’ яхадана’’ таня’ Меретя Григорьевна Тусяда ядэрӈась. Пыда Сёяхана ненэй вадам’ минренаӈэ тара. Школахана мале 22 по манзара. Конкурсахана ханзер’’ нюдяко ӈацекы тохоламбавамда ваде’’ӈась, манэ’’лабтамбись.
Вымна мюсерта ненэцие’’ ню’’ хардахана иленя нито’ тотрев’ нюдяко ӈацекы’’ мэлваха’’ (садикаха’’) ни’’ ханас’’. Тикы серкат школан’ нюртей классан’ тоб’’нандо’ харад’ тер’’ няхатато’ хамдёярка’’. Тарем’ ниванда ӈэванда е’’эмня Сёяха’ школахана подготовительной группа’’ таня’’. Таня’ 6-7 потни тэврамби’’. Хардахана мэсь, паднава’ няю’ ӈудидо’ высылтамба тохоламбидо’, тидхалембидо’. Меретя Григорьевна Тусяда тарця группахана манзара, нянанда манзарана нида етри’ нядабида.
Конкурсахана хари’’ вада’ урокм’ манэ’’лабта тарась. Меретя Григорьевна ненэй сё’ нямна лаханась. Черкесскахана иленя ӈацекы’’ ярабц’, сюдбабц’, нюкубц’’ сё’ нямна инзеле тэри пысаӈгаць. Меретя Григорьевна сертавы урок ихиняндо’ саць поись. Серо тасламбавы’’ хибя’’ сита саць саву’’ӈаць, ӈарка манзаям’ минреванда е’’эмня нянда сейхад ӈэда вади мэ’’ӈаць.
Меретя Григорьевна ненэй вадамда етри’ нерня’ минреда. Пыда вадахананда ненэй вадам’ небдя, лэтрамба тара. Вадамда ниня мэта хибя тэнзада ёхода.
Светлана Тусида’ падвы
