Сянакова’ ялэ ӈатева’’

Тадри’ толава яля’’ пиркана округна’’ тиӈгэвна ты пэрти’’ пирдырма’’ пэӈгуд’’. Маня’’ хардахана иленаӈэ ёльце ӈатейна’’. Небо’ тамна ӈарка пэвдей ирыхына сяха’ ӈэвадо’ таслэйдонзь. Теда’ ханяӈы сянакова’ яля’’ мэлва ёдо’ яӈгамдавы’’.

Время для чтения ~ 2 минуты

Пуровской районхы Тарко-Саляхана ты пэртито’ сянакова Пякупур пул’ ядхана ӈэӈгу. Пыдо’ мядондидо’ ты’’ саполана иры’ нябимдей яляхад ӈатейдо’. Сидя яля’ ямбан’ сянаковадо’ мэтыдо’. Райондо’ ӈэвахана мэна Антон Колодин’ вадавна тюку по’ сянакова ёдо’ яӈгамдаванзь тасламбидо’. Ӈарамдаӈгудо’. Мирдаӈгурта’’ тамна ӈокамда’’. Хуркари мэкад ӈавэ ӈадимдеӈгу’’.

Новой Уренгойхана ты пэрти’’ сянакова’ ялям’ хахаяда по’ ядабтамба пядонзь. Мядодо’ Седэ яха’ няю’ мяраӈгудо’. Нерцюбт’ таняна яра иры’ 24-25 яля’ пиркана ненэцие ма’’лаванзь тасламбидонзь. Теда’ март иры’ 9-10 яляхана ӈобт’ тэваӈгуд’’. Сянакова’ яляханандо’ Тасу’ яв’ тер’’ Пуровской районвана мюсерта’’, Ныд’ няд ӈэрм’ тер’’ таня’ ӈани’ тэворта’’. Яӈганя тэнзм’ мэта’’ ӈобтикы ма’’люрцеты’’. Муравленко’ няна ӈани’ ты пэрти’’ сянакова’ ялям’ мэ’’ӈа’’. Пыдо’ сидя си’’ив яля’ пирувна пирдырма ялямдо’ пуня’ мэвэдонзь.

Тадри яра иры’ 24-25 яляхана мале Надым маркана ма’’лёдава’’. Таняна XXVIII пирдырма ӈэӈгу. Сямянхат пуда Ямальской районхы Сёяха’ ты пэртя’’ ма’’лёда’’. Таёльцяӈгана мале сие ниць иры’ 20-21 яля ӈэӈгу.

Автор: М.Ярой’ падвы

Фото: М.Яр’ тадтавы

Авторы

Няръяна Нгэрм

04:40, 26 января 2024

Темы