Няръяна Ӈэрм
Соё’’ма Яха’ малхана тёр’’ я’’авлыць
Ямальской районхы Сёяха’ вымна мюсерта ненэця’’ не’’ хэбидя яляхана ма’’люрӈаць. Сидя пебяс Вануйто’ ӈэсыхына ӈобт’ тэворӈаць. Евгений’ няби Константин’ мят’ таславы яляхана ӈэдалёда’’ тодо выӈгат няваталаӈго ӈадимяць. Пыдо’ помнандо’ сянаковам’ мэ’’мандаць. Тарця я’ тер’’: Сэр’’ яха, Мотю’’ яха, Вэнуева, Тамбей, Ясавэй яха, Турма яха. Тивтей’’ яха’ няд юрмян ненэця’’ тоць.
Время для чтения ~ 3 минуты
Нердена вадам’ Пэвко Маймович Окотэтто мэ’’ӈась. Пыда яханандо’ юнета, ӈавнанда ва’’лёй сёбар’’ ненэць’. Ӈаркамбой нидо’ илебей ненэцие поӈгат ненадовна ӈадиць. Мале ӈахакуй похона ныхыдо’ мэмы’’ Павел Париденевич Вануйто, Вячеслав Ябтакович Окотэтто, Борис Лапчивич Худи, Алексей Парикувич Вануйто, Анатолий Нюдякович Сэрпиво. Ӈавнандо’ ӈэдалёрпанандо’ сидто’ пир’’ яӈгусь.
Товы’’ ненэйвана ты’’ ӈэхэ’’на ӈэдалёрмам’ ӈатець. Сёяха’ выӈгана нявоталаӈгурпато’ ӈули’’ мерецеты’’. Тикы яляхана Артем Александрович Вануйто’ пирувна ӈэдалёрта юр’’ ненэця’ поӈгана ӈобкарт яӈговы. Нянда пуд Тада Николаевич Лаптандер ӈадимясь. Артем Вячеславович Окотэтто тыда ӈодь’’ варкаць.
Ярколавдавэй’’ ӈобкарт сянакова’ ялям’ ни’’ мэцету’’. Теда’ ӈод’’ хасава’’ ӈэдаравандадо’ яӈговы. Константин Иванович Окотэтто нита поӈгад ва’’лёй ӈэвы. Тыма’ ёльцяӈгана хэхэдана хора яркыбабнандо’ ненэй ненэця’’ пир’’ мэбета яӈгосеты. Ӈадьбята ӈод’’ ныхыдырмахана хусувэй ӈэсоӈодо’ вэнпа вы’ тер’’ хасава’’ мэнедо’. Константин Иванович Сэротэтто Артем Викторовичм’ нэкалмысь. Пудана няхар’’ няндо’ ныхыдырмахана тёр’’ саць я’’авлахамаць.
Не’’ ӈани’ тэри ниць ну’’. «Лэё» организациядо’ мел’ нем’ тэрабавы. Конкурсхана мэна’’ мел’ ӈэвамдо’ манэ’’лабтамбавандо’ хавна сё мэпато’ тарась, стихотворений ваде’’пато’ серо’’ӈась. Таӈок паской панытана мел’ не’’ поӈгат жюрихина мэна’’ няхар’’ нем’ тэраць. Анжелика Вануйто — ӈудикода не ӈэвысь, нябимдей — Елена Сэрпиво, няхаромдэйдо’ — Мерета Вануйто, сэдоӈода ва’’лёйӈэ манэ’’мыць. Тикы яля’ ӈацекыдо’ ӈани’ нидонзь юр’’. Пыдо’ ӈобтикы паныдо’ манэ’’лабтамбиць.
Яля’ ямбан’ Сэрне Алексеевна, Алена Пойкивна ӈока сяй’ хыдям’ пандаӈаханзь. Сидти’ сянакова ялям’ сертабавы’’ ниць юр’’, нянди’ ӈуда’ тер миӈаць. Сянаковам’ сертаба «Ямал» нюбета организациядо’ нядаӈговы. Соё’’ма Яха’ малхана мэ’’мы ялямдо’ пон тензебтембаӈгудо’.
Автор: Марина Ярой’ падвы
Авторы
Няръяна Нгэрм
Темы