Няръяна Ӈэрм
Таӈи каԓитама хитай
Хыԓа камай, дям хэԓ кыниԓей. Дямкна дёԓеԓьш каԓитана» маньԓе ӈанудётуӈ кысуй дян нэхэдятоньш. Пуровский’ районхана таӈи каԓитама хитай. Дямкна каԓиташ мансԓамы» неша» дёԓеԓьш мэмытуӈ поӈктуӈ, ӈанудётуӈ чуув хинтадятуӈ.
Время для чтения ~ 2 минуты
Пюԓ дяхана каԓитана» шича ӈаԓка сельхозпредприятихина» мансԓаӈа». Пуровская общинахана мансԓана» неша» чуки таӈичохона ӈука каԓи» катаӈаш». Каԓитуӈ план ӈопшеԓы ӈуп дёнаԓ тонна» ӈок. Чики общинахана мансԓана неша» хыԓысамыӈ каԓиташту».
Четаӈ дяха”хана, тохо”на хэԓта тамна ниньшику. Навэт хэԓ хомана кыниԓемахат ӈай каԓиташ чепьны». Дяхаӈ хэԓ кыниԓемахат Самбуԓкаӈ няна ӈайта Пуровский совхозхана ӈупчики дёԓеԓьш хитадяташ». Таӈичохона таньняна хампԓяӈк каԓитана бригада» мансԓаӈаш». Ӈопшеԓы таӈичохона каԓиташ мансԓамы» дюԓкат ва’та няхаԓдю» тонна каԓи» дёԓеԓьш няаммай». Чуки похона хэлаку» каԓи» камна ԓаӈкуԓки», кэмԓхи», пыԓи», нику» катамай». Непоӈ Пуровский’ районхана каԓитана» ӈопшеԓы ӈуп дёнаԓкат ва’та» хампԓяӈк дюԓ ӈок тонна каԓи» катаӈаш». Чуки похона шаӈок каԓи» катамамтоӈ сельхозпредприятии» деты пуӈ ӈэйвахана хомана тасԓанӈатуӈ. Каԓитама -куптат тадяӈэйта мансдя. Дяԓи» таха”на, куԓкаԓи нумкна неша» каԓиташту». Дяԓяӈ дямпхана витпоӈкна мансԓама неньшаԓ ниӈа.
Таԓям таньше мансԓама шеэмна мансдя. Чуки ноптухуна каԓя» пу» тахана чидюмты». Таԓям планамтуӈ комантуӈ мэт, нешаӈи» хыԓаӈ ӈупчики каԓиташту». Четаӈ дяха”хана, тохо”на хэԓта тамна ниньшику. Хэԓ тамна хомана кыниԓевтамэн дяку», токуши» нимня дятыԓана ниӈа. Таԓям тоса» таԓа. Чейня хэԓ ниӈ кӭш вайма, хыԓаӈ ӈыԓна хэԓта тамна дяптаку. Навэт хэԓ хомана кыниԓемахат неша» ӈай каԓиташ чепьны».
Автор: Андрей Пяк патмы
Авторы
Няръяна Нгэрм
Темы