Тамдо’ мэ’’ӈадо’

Яна’’ нийм’ янамбовна сыра тондада. То’ ид’’ салабаӈэ хая’’. Ӈэрм’ я’ някуна мале вэба’ иры’ пудана яля’ пиркана пи’ ханьӈэ ханӈась. Тедахав’ таняна мэё тецьда’’ пэяд’’. Мюсерта ненэця’’ ӈарка идето’ салабаӈэ хэвам’ ӈате’’. Янамбовна нерня’ мюсе’’.

Время для чтения ~ 3 минуты

Ненэця’’ мюдато’ ӈэва мале ӈахакуна пырдари’ сядхалэйдонзь. Теда’ мянувнанда тэхэ’’на мэна’’ пэдёдамдо’ нэкалпи’’. Тыдо’ таӈга хадырӈа’’, неняӈг’’, пилю’’ ӈахана яӈгу’’. Тедари’ я’ сяр’ нийм’ ёря сыра тондава’ нерцю нылана’’. Няби я’ панхана невхы иринато’ недарми нюракуць Ямальской районхы Яр-Саля’ ты пэртя’’ мюсерӈа’’. Я’ хобан’ ханзакад мерёӈэ сояравы сехэрыдо’ илева’ нёдэйдо’. Яля’ падарт’ сыртадрев’ мюсерӈа’’. Ханзер’’ илевамдо’ нянда’’ тэвравани е’’эмня хэвы си’’ив яляхана серо теневана ненэцяӈгана лаханакурӈадазь. «Ярсалинской» совхоз’ тер’’ хурка ӈэвам’ предприятияндо’ ӈэвахана мэна Александр Сооковичм’ хонрамбидамзь.

Фото: Марина Яр / Няръяна Ӈэрм

Мани’ лахарёми’ тарцясь:

– Теда’ ты пэртина пырдари’ мюсе’’. Хахаяда яля’ тамна лаханавдавэй’’. Тамдо’ мададо’, ӈани похо’’ тасла тэтнаць. Пилю’’ ирыхына саць ядембись, ты’’ паддець, ӈадьбята хаӈгурта тэва’’ ӈокась. Тивдо’ едена’’, мэдна’’ таняць. Нарада саць ямбась, ханярина нядэ’’ ӈокаць, тикыд маяндорӈа’’, сырам’ нидо’ мадаӈгу’’. Небо’ по’ пуняна нувода вэваркаць, нарада ямбась, яхадей’’ яноць ни’’ӈаць. Хавы тэва’’ ӈокась. Тев’ ёльцяӈгана ненэциена’’ нара’ няна ӈэсы’’ помна хэвы тыдо’ ма’’ламби’’. Вадодо’ мале сертавыдо’ ӈэӈгудо’. Тадри’ тыдо’ толаба пяӈгу’’. Тикар мянувнандо’ ӈобтикы тэтнава’ паӈо. Хабартаван’ мале ӈанэдыва’’, тына’’ ӈокавна хавы ӈэбато’ ӈод’’, яханава’ нямна планава’’ томдаӈгува’’. Яханабито’ пуд’ сыв’ мэлвахато’ мюселтыд’’. Сяхаринда техэ яхандо’ тэввадо’ Неро’’ явхад пере. Мер’ ханимбата, нюдя пэвдей иры’ пиркана — мер’ явм’ мадаӈгудо’. Маня’’ тэхэ’’на мэ’’наӈэ илма’’ нумгад пере. Тыдо’ хабар’’махадандо’ ненэциена’ яв’ тяха’ тэв’’махадандо’ ӈани’ таӈгамда’’.

Ти, ӈарка яна’’ тиӈгывна мюсерта’’ нина’’ тюку яля’ пиркана тарем’ иле’’.

Автор: Марина Ярой’ падвы

Авторы

Няръяна Нгэрм

05:00, 27 октября 2025

Темы