Няръяна Ӈэрм
Тарана няд’’ма
Ненэциена’’ харе’’ невхы иландо’ саирм’ нёдавандо’ е’’эмня хуркари няд’’ми ӈадимдемби’’. Тикыдо’ илаӈгана саць тарана’’ ӈамгэ’’. Няхар’’ сян по’ тяхана тамна едэй ея’ мядо’ тамба пяць. Тедари’ ӈарка яна’’ тиӈгывна Ямална’’ хавна тарцям’ ханяхартана ни’’ ӈадимдембю’’.
Время для чтения ~ 2 минуты
Тарцям’ ня’’амва’ няю’ илебей мяд’ тер’’ ӈэсь тара. Няби ханяӈэнди’ нес ненэцяӈг’ поди’ няхар’’ ю’’ самляӈгхад вабта ни серос’’. Нердена няд’’ма ӈадима мальӈгана мяд’ тер’’ няхар’’ нюдо’ ӈэбта тарась. Небой поход мюсерти’’ ватовна мале сидя нюсавэйӈэ хэвэхэртан’ ея’ мяд’ няд’’мам’ мипи’’. Нюди’’ харвобта харти’ соявыди’ нёя’’ ӈа’’, евако ӈацекым’ вадабати’, пыди’ нюданди’ толёбата ӈани’ тарця ӈавэ’’ е’’эйтаӈаха’.
Мяд’ тер’’ няд’’ма’’ мято’ ӈавэ’’ толахая таславы’’. Мюнянда ӈэдида ти’’: ӈу’’ — 40, таретей’’ — 2, мэта ея, парасин ея — 2, хор — 1, тюмю — 1, лата — 1,5 м.куб., хан — 2.
Есяхана мир’’ӈэ таслаб’’ мат’’ юр’’ сидя ю’’ си’’ив ёнар’’ няхар’’ юр’’ сидя ю’’ сидндет еся ӈэӈгу. Тарцям’ ня’’ма таслаб’’нанд харе’’ иле яхананд ӈэрм’ тер’’ серо тидхалембада ерво’’ мякана падарм’ падаӈгун. Падарм’ пад’’махаданд ӈамгэ’ пирт’ ӈатенаӈгун. Ӈатенани’’ поӈгана мэб’’ 180 яляхад ӈока ӈэбта ни серос’’.
Небо’ Тасу’ яв’ няна няхар’’ ю’’ си’’ив мяд’ тер’’ ея’ мяд’ няд’’мам’ ня’’амвыць. Тюку по’ мале няхар’’ ю’’ сидндет ея’ мядм’ ми’’мыць. Округна’’ тиӈгывна самляӈг ю’’ мяд’ тер’’ мяцавэйӈэ хэвыць. Пыдо’ мал’ невхы иринато’ недарми нёдана ненэця’’.
Автор: Марина Ярой’ падвы
Авторы
Няръяна Нгэрм
Темы