обновлено: 04:04, 20 октября 2023
Няръяна Ӈэрм
Таром’ ха’’авраӈгудм’
Сян ялэ’’ тяхана, ӈопой синё хубтахана, ӈарка Неро’ явм’ тиртя ӈанохона мадавась. Сидя час сидер’ сихыд сырӈадм’, нядэй ям’ маниедм’. Ихинани ма’’нидам: «Мань яни няна, тарцякуеми яӈгусяню’’. Ханэй хой’’ пэдараӈэ хая’’, тиртя ӈано сюрхалм’ серта, Новый Уренгой март’ пили’’ ӈамдыв’’.
Время для чтения ~ 2 минуты
Округханана’’ ӈадимдембади книги самлянзимдей фестивалян’ товэдм’. Нюми Макар Ӈокдэта — паднана ненэцядм’, тарця’’ серони’’ танясеты’’, тарем’ си’’ми хамы’’. Ян’ ха’’ам’’махадани машин толаӈголава хардан’ си’’ми хана. Таняна мале ӈатенавы’’. Мят’ тюдм’, сэвни мэ’’ӈадм’, ненэць’ ӈока — хуркари’’ луца’’, сеяв’ санлы’’. Тарем’ сырӈадм’, теневана нями — не нями манэ’’ӈадм’, Неко Ӈокдэтам’, сеяв хаця таӈгма. Нина Ядне хадами тикахана мэвы, теневана хаби’’ нини’’ сэв’’ӈадм’ — Дмитрий Кельчин, Иван Сандрин, Екатерина Сюлись — сеяв’ тоярць ӈэвадэй’’.
Ямална’’ тиӈгад паднана илаӈгы ненэця’’ ӈобт’ ма’’лавы’’. Тет яля’ ямбан’, паднава’ сер’’ ханзер’’ минревам’ тасламбива’’, падна тохолкува’’, тикы серона’’ поӈгна сё мэ’’ӈава’’, лаханако ваде’’ӈава’’, падвы манзаина’’ няхана толабива’’. Тикы’ хавна Москов хардахад товы’’, мале ханярина паднава’ серкана пыхыдадо’ манэ’’лабтавы’’ таняць.
Теда’, фестивальна’’ мале’’махад, пыхыдами тэри тароси’’ ядэрмэӈэ нив тасламбю’’. Ӈамгэхэв едэй и’ ӈу’’ ӈэвани мю’ ха’’амна’’ то’’олха’’, ӈамгэхэв серм’ таслана то’’олхадм’. Ханзер’’ тамна’ тяха’ нерня’ ми’’мами, хаця ӈадиберць пэй’’. Маси’’ сяхари’ ӈэбта, мань паднава’ манзаяханани сава серм’, таром’ ха’’авраӈгудм’.
Пуня’ минзь, тиртя ӈано’ мюд, ӈани ян’ сырӈадм’, ихинани мадм’: «Нядакоцёв’’, мякни тэвраб’’ни сидта’’ саванёв’’».
Явм’ мада’’махадана’’, Новый Порт’ нимня това’’, хоё’’ маха’’ ний’’ сэр сыракохона путратавы’’.
Автор: Макар Окотэтто’ падвы
