Няръяна Ӈэрм
Таром’ ха’’аврамби
Округханана’’ ява’’ лэтрамбада’’ нина’’ е’’эмня нядаӈгован’ харвана’’ ненэця’’ ӈока’’. Марка’’на, нюдяко хардаха’’на тэмдавы’’, ӈудахана сертавы’’ саць тарана’’ ӈавэ техэ ян’ ӈэдарамби’’.
Время для чтения ~ 2 минуты
Ямальской районхана Сёяха хардахана ила’ саир’ нямна манзарана хардадо’, «Дом культуры» нюбетадо’ таня. Таняна «Для СВОих» нюбета проектм’ минре’’. Ныланава’ яляхана сайнормахана мэна’’ няханато’ тараванда’’ ӈамгэ сертаванзь ма’’люрӈа’’. Хуркари’’ ле’’нюй сертаби’’, лыӈгаӈэ мэ’’манда’’ поӈг, носок паӈгалпи’’. Тохолкода’’ ӈацекы’’, ненэця’’ мяд’ терсавэй’’ нядаӈгованзь турӈа’’.
Ӈаркамбой’’ ненэця’’ ӈани’ тарця серкана таром’ ха’’мола’’. Ӈопойдо’ — Анатолий Очевич Вануйто. Пыда харад мята мюня сайнортаха’’на тарана’’ поӈг паӈгалпи. Ханзер’’ панорць таравам’ тохолавэда. Ямална’’ ӈэвахана мэна ервана’’ вато’’ сер’ ӈадимдевы грант’ есяха’’на «Небяни табеко» общественной организация’ тер’’ паӈгалмандадамда тэмдавы’’. Манзаямда ӈули’’ савамбовна, нензел’’мана тидхалембида. Харта инда ватохона тарця серм’ минреванзь таславэда. Паӈгалмыда ява’’ лэтрамбада’’ няхана’’ волонтёр’’ ханлэйдо’.
Анатолий Очевич пенсияхана мэ, хабцянда е’’эмня мякнанда ӈамды. Тедахав’ ядэрма нянанда тоена. Мяд’ мюй ӈамгэри пэрць нида нядабидо’. Ӈавнанда харбё, ва’’лёй ненэць’ ӈэвы. Тарем’ хусувэй сертаванда манзаям’ таминда тидхалеӈгуда.
Ява’’ лэтрамбада’’ нина’’ поӈг харто’ лыӈгадандо’, еся ханото’ синд’’мяӈэ мэ’’эйдо’. Яхадана’’ нядаӈго хуркари’’ ӈамгэри ӈэдарамби’’, тикыдо’ нянандо’ саць тара’’.
Окотэтто Руфина’ падвы
Авторы
Няръяна Нгэрм
Темы