обновлено: 04:10, 21 марта 2023
Няръяна Ӈэрм
Тарота ӈацекы
Тюку илаӈганана’’ ӈацекы’’ хусувэй ӈамгэн’ тоходана пир’’ӈадо’. Янамбоковна нюдяко’’ хардахартаха’’на хуркари’’ едэй’’ тохолкубц’’ ӈадиберӈа’’. Тарем’ Ӈэдяӈгана илена’’ ӈацекы’’ тароць тоходана’’, таро’’мандо’ нюм’ — «смешанные боевые единоборства ММА». Теда’ пыдо’ мале я’ тиӈгэвна минда пирдырмаха’’на пыхыдадо’ манэ’’лабтамбидо’.
Тандая’ Тюмень’ нямна ӈэдалёрмыць. Таняна Уральской федеральной округ’ чемпионат няби первенство мимэхэнзь. Россия’ ханярид товы’’ ӈули’’ ӈока’’ ӈэвыць. Ӈэдя’ тер Иван Яптунай, сибимдей классахана тохолкода ӈани’ таня’ сянакованзь хан’’мысь. 14-15 потна’’ нита поӈгана пирдырмысь. Нямэхэна лимбя’ ирыхына округханана’’ ӈэвы пирдырмаха’’на няхатата мэбе’’мысь, нюртей ян’ ха’’амвыць. Ӈадьбята са’’манда нид тамна’ тяха’ ӈэдаравыдонзь. Сита тидхалембадада, Степан Николаевич Яптунай тарем’ лаханась:
— Пирдырман’ сямянхат мэбете’’эдо’ ма’’лыць. Нё’’лёко хардахад ядэрта ӈацекэхэна тикы ёльце тоена. Тарем’ янда ӈаха’’мна ӈэдалёр’’мада сяхаӈгарт’ яӈгусь. Ӈадьбята няданда ва’’лёярка’’ танявыць. Пыда тандая’ вадёдана пэвы ӈацекы. Мале сян по’’ пыхыдамда тохоламбаӈгу, няданда ватада яӈгода!
Степан Яптунай тохоламбада ӈацекэда няхар’’ ю’’ пир’’. Си’’ив яляхана ӈобт’ няхар’’ ма’’люрӈа’’. Пирдырмито’ нерцюна заламдо’ етри’ лэтамбада’’ то’’олха’’. Салехардан’ турмандо’ ёльцяӈгана пыхыдадо’ ӈули’’ савовна манэ’’лабтавыдо’. Иван Яптунай’ хавна Андрей Арестов няхарамдэй ӈэвысь, пыда 12 пода. Хибя мэбе’’ман’ харва мал’’ сёбар’’ ненэцие’’ мят’ «Сармикан’» ханаць пир’’ӈадо’.
— Ӈэдяӈгана таро’’ман’ харвана ӈока. Мань нюдякомбой 12-15 потна тохоламбидм’. Мале сян по’ сиддо’ табэдамбаӈгудм’. Хой’ терни ӈани’ таня’’. Няхатато’ харбёдо’ ти’’ ӈэванзер’ ӈа’’. Ӈопой’’, тедари’ сиддо’ пирдырмаха’’ нидамзь хан’’ла. Сяхари’ ӈари’’ тоховандо’ сер’ ядэлаӈгун. Тарем’ ӈэдалёрп’’ тарана ӈамгэ ӈока нив ӈа’’. Мэта’’ ембдяр’’ тараню’’, еся’’ ӈэдакы’’. Таддикахад ханяхав ӈэдалаб’’ хубта, нумда вэва ӈэсь пир’’ӈадава. Тюменян’ нюрте’’э тиртя ӈанохона, машинахана, еся сехэрэвна хаяваць. Пуня’ ӈани’ тарем’ товаць. Билет ӈахакуд тэмдадамзь. Пуна няхар’’ яля хадась, тиртя ӈано’’ ниць тир’’. Тетимдей ялярихина тийнаць, — лаханако нята нями ма.
Тарця тарана, едэйвана ӈадимы сер’’ нерняри’ миӈая. Похо’’ «Сармикахана» тохолкода’’ ӈокамданая’’. Ӈэдя’ тер’’ сенз’’ ӈэя’’.
А.Яптик’ падвы Сидяӈг: С.Яптунай’ тавы’’
