Няръяна Ӈэрм
Тасу яв’ ӈацекы вэдепись
Тохолкова’ серо минрена департаментхана манзарана Тусида Светлана Ивановна ӈарка пэвдей ирыхына Тасу яв’ ня’ ӈэдалёрӈась. Таняна школаха’’на ӈэрм’ тер’’ ӈацекы тохоламбавам’ манэ’’ӈась.
Время для чтения ~ 2 минуты
Техэ тэводана яда — Ӈэдя’ школась. Тикы тандая’ мивы няхар’’ яӈорэй’ ӈэда сюдбяко харад. Таняна ӈока соходо’ ты пэртя’’ ню’’ тохолку’’. Сиддо’ ӈавнанда Ӈэдя’ школамдо’ ёльцевы’’ нидо’ тохоламби’’. Тикадо’ сейхана пои.
Округна’’ тиӈгэвна Ӈэдя харад сямянхат ӈыхы яхана ӈэда хардаӈэ толы. Тюку яля’ пиркана няхар’’ ёнар’’ мян ненэця’’ иле’’. Ӈока соходо’ тэхэна мэна’’ ненэця’’, тикыт ню’’ школахана тохолку’’. Невхы хардахата таслаб’’, Ӈэдя харад теда’ саць ӈаркаӈэ хая. Тарця вэӈго харад’ мюня ты пэртя’’ ню’’ тохолку’’. Таняна ненэй вадамдо’ ӈани’ тохоламбидо’. Людмила Ивановна Потапова няби Леонид Юрьевич Салиндер сиддо’ тидхалемби’’. Пыди’ ӈавнанда Герцен’ нюмам’ нюбета Университетм’ ёльцевэхэнзь. Лаханаванди’ хавна вадамди’ тамна тяхасовна теневади’. Ӈэрм’ тер’’ ӈацекы’’ урокадо’ ӈули’’ харвабтэйдо’. Ӈадьбято’ таня’ паромбасеты’’.
Тазовский районхана тохоламбада ӈацекыто’ поӈгана Салиндер’’, Яр’’, Яптунай’’, Окавай’’, Лапсуй’’, Яндо’’, Евай’’ еркаро мэта’’ тохолку’’. Тэхэ’’на мэна’’ небянадо’, нисянадо’ Ӈэдя’ вымна, Енся’ нямна, Танам’ няна мюсерӈа’’. Халям’ хадабада’’ Юрибей’ няна, Ӈарка то’ хэвхана, Лабаӈгане’ няна нядэ’’.
Светлана Ивановна няби нята няда Светлана Алексеевна Алексеева математика’, луца вада’, ненэй вада’ урокм’ манэ’’манзь тюӈгавэхэ’. Вы’ тер’’ ӈацекы’’ варемдо’ мэць едэй теневабцу хомби’’. Тохолковамдо’ сававна пирдалембидо’. Ханяӈы тоенана сер’’ ӈадимб’’, ӈарка няхато’ лахана’’.
Ӈацекы тохоламбада’’ е’’эмня яӈга ненадо тасалковам’ мэ’’мы’’. Ханзер’’ ӈацекэхэ’’на манзаравамдо’ ваде’’мы’’. Сававна тидхалеӈговамдо’, табековамдо’ тасламбавы’’.
Автор: Г.Кинчина’ падвы
Сидяӈг: М.Яр’ тадтавы
Авторы
Няръяна Нгэрм
Темы